Shillong, Naiwieng 14: Ka kynhun Myntri ka Sorkar Jylla ha ka sngi Thohdieng, kala ai jingmynjur ia ka jingthied jaka sa 35 acre ha Tynring, New Shillong Township, ban pyniasoh ia ka Administrative City bad Knowledge City.
Kane ka jaka kan dei ruh ka jaka ban tei ia ka Central Jail, ka ban bujli noh ia ka Jail kaba don ha Nongbah Shillong.
Haba kren sha ki nongthoh khubor hadien ka jingialang, u Myntri Sorkar Bah Wailadmiki Shylla ula batai ba ka dor jaka bala iapynbeit ka hap hapdeng T.250 shi sqft bad T.2,691 shi sq meter, kaba long hapoh ka dor bala pynbna da ka Deputy Commissioner, kaba long T.2,900 shi sqm.
U bynrap ba ka jingiapynbeit ban thied ia kane ka jaka kala iaid shakhmat bad ka jingtei ia ka Central Jail kan sa sdang noh tang mar syn ioh ia ka jaka.
Kane ka sienjam ka dei shibynta jong ka New Shillong Township Development Plan, ka ban don shibun ki project-kynthup ka Administrative bad Knowledge hub-ban pynkylluid ia ka Nongbah bad pynkhlain ia ka roi ka par ka thain.
