Shillong, Nailar 26 : Ka Sorkar Meghalaya kala rai ban thaw ia lai tylli ki sub-committee ki ban iakren bad ka GHADC, KHADC bad JHADC, halor ka rai jong ka ban siew tulop hi noh ia ki Nongtrei jong kine ki ADC naduh ka 1 tarik Naiwieng, 2025.
Kine ki Committee kin khmih ruh ia ki lad ki lynti ha kaban pynbeit ia ki jingeh ba kine ki lai ADC ki mad ha ka liang ka pisa pilain bad ka rukom pyniaid kam, haba pynthikna ba kin bat ia ka jinglong laitluid bad ka bor bala pynkup da ka Riti Synshar ka Ri.
“Ka sub-committee kan iakren bad kine ki lai ADC ha kine ki 45 sngi ban wan bad ban aiti ia ka kaiphod sha ka Sorkar Jylla” ong u Myntri Rangbah Conrad K Sangma haba iakren bad ki lad pathai khubor hadien ba pyniaid ia ka jingialang jong ka Kynhun Myntri ha ka sngi Ba-ar.
“Ka Sorkar kan sa shim ia ka rai haba pynshong nongrim ia ki kaiphod ba ioh na ki sub-committee ba kumno yn pyniaid shakhmat ia ka kam bad kawei pa kawei ka ADC” ula bynrap.
U Myntri Rangbah ula kren ruh da kaba shai ba ki ADC ki don ia ka bor ban kyntait ia kine ki jingtyrwa da kaba ong “Kane kam dei kaba long kongsan. Kane ka dei eh ka kam ba iadei bad ka jingdon ia ka pisa tyngka kaba biang jong ki Council”.
Ula kular ba ka Sorkar kan ym tuklar satia ia ka jingtreikam jong ki Council, kynthup ki kam jaka puta, ka hok tynrai, bad ki bor bala pynkup ha ka Riti Synshar ka Ri.
“Namar kata, ka jingkylli kam mih satia bad kam don ruh ka lynti ia ka Sorkar Jylla ba kan leit ha ka ban mushlia ia ki jingtreikam jong ki ADC” ula ong haba pynpaw ba ka Sorkar kan ai ia ka jingkyrshan pisa sha ki ADC, kynthup ka jingpynsiew ia ka tulop ki nongtrei, bad kiwei kiwei.
Ki ADC kin hap ban don ia u/ka Principal Secretary,kaba bha eh u/ka Ophisar MCS bala rangbah ne Ophisar IAS, ki ban khmih ia ka rukom pyniaid ia ka pisa pilain bad pynthikna ba ia ka pisa la pyndon kam bei thik na ka bynta ka tulop bad ban wanrah ia ka jingpynkylla ha ka rukom pyniaid ia ka kam pisa pilain.
“Ngi don ka jingsngewkhia halor ka jingbym biang thikna ka pla pisa tyngka jong ki ADC. Kumta, ngin sa bthah ia ki Council ba kin don ia u/ka Principal Secretary kiba lah ban dei ki Ophisar MCS bala trei slem ne ki Ophisar IAS ban khmih halor ka rukom pyniaid ia ka pisa tyngka jong ki Council khnang ban pynthikna ba ka pisa ba ai, la pyndonkam beit thik tang na ka bynta ka tulop bad ki jingpynkylla ha ka rukom pyniaid ia ka pisa pilain kum ka service rules, financial rules, procurement policy-kaba long kongsan namar ka thungkam thungjam bad kine kiei kiei baroh ki dei kiba lam sha ka jingbym biang thikna ka pla tyngka jong ki Council” ong u Conrad.
“Ngan kren da kaba shai ba ka Sorkar kan ym tuklar ia ki jingtreikam jong ka Council. Ka Riti Synshar ka Ri ka don ban iada ia ki ADC lada ka Sorkar ka pyrkhat wat tang shi minit ba kan leh eiei halor ka rukom treikam jong ki ADC” ula bynrap.
Haba khein ia ka rai jong ka Sorkar kum kaba kongsan, u Conrad ula ong ba ki ADC khamtam ka GHADC kala iakynduh ia ka jingkyrduh pisa kaba jur bha, namar ka jingiapher bak ly bak hapdeng ka jing lah pynmih pisa bad ka jingdonkam ia ka pisa ban siew tulop.
“Mynshem snem, ka GHADC ka donkam ia ka jingsiew tulop ba kot haduh T.70 klur katba ka jinglah pynmih pisa ka long hapoh ka T.25 klur. Kumta ngi iakren hangne ia ka jingduna pisa ba T.40.45 klur. Kumjuh ruh ha JHADC, ka don ka jingduna ha ka jingpynmih pisa bad kumta ka Council kam lah ban siew ia ka tulop. Ka KHADC ka kham biang ha kine ki 15-20 snem, kam shym la thungkam palat. Ka jingdon ki nongtrei ka long kumba 800 ngut” ula ong.
Ula iathuh ba ka GHADC kam shym la shah ruh ban don kano kano ka jingthungkam ha kine ki 6-7 snem bad namar kane, ka jingdon ki nongtrei kala hiar na ka 2300 sha ka 1300. Kumjuh ruh ki nongtrei ha JHADC kala hiar na ka 2000 tam sha ka 1300-1400.
