Shillong, Naiwieng 26 : U Myntri Rangbah ka Jylla Conrad K Sangma ula pynbna ia ka jingmynjur jong ka Kynhun Myntri ban thied jaka na ka bynta ban iabujli bad ka jaka shipai, ka sienjam ba kongsan ban lah pyntrei ia ka project pynheh ia ka Shillong Airport.
Haba kren sha ki lad pathai khubor hadien ba dep pyniaid ia ka jingialang ha Nan Polok hynne ka sngi Balang, u Conrad ula ong “Ngi la iakren ia ka jingtyrwa ban thied ia ka jaka ban iabujli bad ka jaka shipai na ka bynta ban pynheh ia ka Shillong Airport. Ngi lah ai ka jigmynjur ban pyniaid shakhmat ia kane namar ka long kaba donkam ban pynheh ia ka Shillong Airport khnang ba ki liengsuin kiba heh kin lah ban wan hiar”.
Ula pyntip ba u Symbud Myntri Rangbah ba khmih ia ka Tnad Transport Bah Sniawbhalang Dhar un sa iakren bad ki trai shnong bad ki Rangbah Shnong ka thain na ka bynta ban lah pyniaid beit iaid ryntih ia ka jingthied jaka bad ka jingbujli jaka.
U Myntri Rangbah u pyntip ba ka jingialang kan sa long ruh ha ka sngi Thohdieng ban nang pynbeit ia ki kam bala pynsngew da ka Directorate General of Civil Aviation (DGCA).
“Nga dang shu iakynduh ia u Myntri bad ki Heh na ka Airport Authority of India (AAI), Civil Aviation bad na ka DGCA bad kan sa don ka jingialang la sngi Thohdieng namar ki don ki kam kiba hap ban pynbeit. Ngi khmih lynti ba hadien kae ka jingialang, yn sa ai dak ban sdang noh ka jingkhot tender ia kaba yn leh da ka AAI hashuwa ban kut une u snem bad naduh kane ka por, 15 bnai yn ai ban trei pynheh ia ka runway bad ngi khmih lynti ba hapoh u Lber 2027 kane kan sa urlong” ula ong.
“Ia mynta, ki don ki kam bad ki jingsngewkhia haba iadei bad ka jaka hiar ki liengsuin bad kiwei ia kaba ka DGCA kala kdew, kiba ngi donkam ban khmih kumno ban pynbeit ia ki. Ka jingialang la sngi Thohdieng kan don ban iakren ia kita kiei kiei baroh” ong u Conrad.
