Shillong, Naiwieng 26 : Kum ka sienjam ban wanrah ia ka rukom leh ba khampher bad ba iajan bad ka mariang, u Myntri Rangbah ka Jylla Conrad K Sangma hynne ka sngi Balang, ula lum ia ka jingialang ba kyrpang jong ka Kynhun Myntri ha Nan Polok.
Kane ka jingialang ba neh haduh saw kynta eiei, ka dei shibynta ban pynbteng ia ka jingdon ia ka mynsiem lehkmen da ki tamasa bapher bapher hashuwa ba kan wan ka Khristmas.
“Ngi la pynlong ia ka jingialang ba kyrpang jong ka Kynhun Myntri mynta ka sngi. Kumba phi lah ban iohi, ngi don hangne ha Nan Polok bad kane ka dei ka jaka ba la buh kum ka rynsan ka ri Japan ha ka tamasa Cherry Blossom, kaba la bteng pat sha ka Literary Festival, bad kan bteng biang kum ka rynsan pyni nam iaka kolshor bad ka tynrai jong ngi ki ban long ha kine ki taiew ban wan, bad jam shakhmat sha ka Khristmas…kumta, ngi sngew ba kan iahap bha ban pynlong ia ka jingialang ka kynhun Myntri hangne ha ka jaka ban ioh ia ka jingsngew jong ki tamasa baroh bad ha kajuh ka por ban ailad ia ka kynhun Myntri ruh ba kan long shi bynta jong kine ki tamasa bad ki prokram ba ngi la pynlong” ong u Conrad haba iakren bad ki nongthoh khubor hadien ka jingialang.
“Ka dei ka jingialang Kynhun Myntri ba kyrpang namar ngi la iashong slem bha bad kala neh jan saw kynta” ula ong haba pyntip ba kane ka jingialang kala pyndep ia ka jingiakren haduh 16 tylli ki mat kiba iadei bad ki kam pynroi hapoh ka Jylla.
