Shillong, Jylliew 04 : Ka Kynhun Myntri hynne ka sngi Balang kala ai jingmynjur ban pyntreikam ia ki projek bapher bapher ban pynmih bording hapoh ka Jylla.
Katba ka sorkar jylla ka dang pynkhreh ban iasoi ia ka Memorandum of Agreement (MoA) kaba thymmai bad ka Athena Projects Pvt Ltd na ka bynta ka Kynshi stage-I kaban pynmih ia ka bording kaba 450 Megawatt, kala ai ruh ia ka jingbit ban bhah T.14 Klur ban pynkiew ia ka jingpynmih bording jong ka Riangdo Small Hydro Project sha ka 6 Megawatt nalor ka jingpyntreikam ia ki artylli ki ‘Self-Identified Power Project, kiban ai bording ei ia ka jylla da 12 percent.
Haba iakren bad ki nongthoh khubor, u Myntri Rangbah ka jylla u Conrad K Sangma ula ong, “Ngi lah rai ban pyniaid shakhmat bad ka Kynshi stage-I bad ban iasoi ia ka MoA bad ka Athena Projects Pvt Limited.”
“Ngin sa iasoi ia ka MoA bad ki da ka projek kaba la dep pynkhreh naduh nyngkong (original project) ba kan sdang pyntrei namar a Athena ka lah dep leh lut ia ki kam ki jam kiba iadei bad kane ka projek (kaba la shu sahkut mynta la bun phew snem)” ula ong.
Haba batai shaphang kane ka projek, u Sangma ula ong ba ia ka Kynshi project ha kaba nyngkong la iasoi ban pynmih 450MW. Hynrei hadien ka jingkhmih bniah da ki kynhun bapher kynthup ia ka water commission, la shem ba kane ka projek kam lah ban iaid palat ia ka 270 MW.
“Namar ba ia kane ka project yn pynhiar noh na ka 450 MW sha ka 270MW ki bynta kiba iadei bad ka jinglut jingsep kila mih bad ma ki (Athena) kila artatien ban pyniaid shakhmat ia ka kam bad kane ka projek kam shym la lah ruh ban iaid shakhmat watla ka Athena kadei kaba la leh ia kiba bun ki kam ki jam kynthup ban iakren bad ki trai nongshong shnong, ban pyn ioh ia ka Environmental Clearance, bad kiwei kiwei” ula ong haba bynrap, “Ngi lah khot ia ki ha kine ki khyndiat snem bad ban kylli la ki don ia kano kano jingthmu ban pyniaid shakhmat ia ka project bad lada kim treh ngin hap ban pynduh noh ia katei ka projek. Hadien ka jingiatai sani bha bad ki, kila rai ba ia kane ka MoU lah ban pynkylla da kaba pynrung ia ka pump storage project (PSP) bad ki katto katne ki bynta jong ka solar project bad ban pyniaid ia ka River Project kumta kane ka project kan long kaba biang bad kila kyntu ia ngi ban pynkylla noh ia ka MoA”.
Kumta kala mih ka jingai jingmut ba dei ban pynkut noh ia katei ka projek ne MoA bad ban iaid noh da ka MoA kaba thymmai bad ki kor teknoloji kiba thymmai jong ka PSP bad kiwei kiwei. Hadien ka jingpynduh noh, ka jingthmu ban pyniaid shakhmat ia ka kam bad ka MoA kaba thymmai bad ka PSP, Solar Project bad ban pyniaid ia ka River Project ha ka, ka Athena group kala pynpaw namar ba ka sorkar India ha katei ka por kam shym la pynmih ia kino kino ki jingthoh ne kyndon jingbthah halor ki PSP, kumta namar ka jingbym shai, la ki kwah ne kim kwah ban iaid shakhmat, kumta katei ka projek kala sahkut beit hajuh”.
Ha kaba iadei bad ka jingkyntiew ia ka jingpynmih bording ka Riangdo Small Hydro Power Project, u Sangma ula ong ba ka tnad bording kala wanrah ia ka jingtyrwa bad hadien ba la dep ban khmih bniah da ka IIT Roorkee, kila pynpaw ba kane ka projek kadei kaba lah ban kyntiew ia ka jingpynmih ia ka bording na ka 3 MW sha ka 6 MW.
U Myntri Rangbah ula ong, ba ka kynhun myntri kala mynjur ruh ia ka jingtyrwa ban tei ia ka Nongmer Small Hydro Project kaban pynmih 24 megawatt.
“Kane kadei ka self-identified project. Ia ka jinglut jingsep baroh yn pynlut da ka kompani. Ha kane, tang kawei ka kyndon kaba donkam ka long ba ia katto katne ka bording dei ban thied da ka sorkar jylla. Katkum ka National Rules, kaba ailad ia ka National Tariff Policy 2016, ka ailad ia ka sorkar jylla ban thied 30% ia ka bording ha ka PPP, ngi lah rai ban jam sha ka jingiateh kular ban thied 30% bad nalor kane, ngin ioh ei ruh sa 12% ka bording” ula ong bad ka bynrap “ia kane ka projek yn bei tyngka baroh da ka kynhun shimet hynrei ngi ngin ioh jingmyntoi ban don ka jingskhem ha ka jingdon ia ka bording. Kumta ka sorkar jylla kala rai ban mynjur ia ka jingpyntreikam ia ka Nongmer Small Hydro Power Project.”
U Conrad Sangma ula ong ba la ithuh ruh ia ka project ha Umran da ka JMB Aqua Private Ltd, kaban pynmih ia ka bording kaba 13.5 megawatt ha Umran. Ka sorkar kala rai ban mynjur ia kane ka jingiatehkular na ka bynta kane ka power project ban tei ha Umran.
