Shillong, Nohprah 02 : Ka Kynhun Myntri ka Sorkar Jylla ha ka sngi Nyngkong, kala ai jingmynjur ia ka jingtyrwa ban pynjlan ia ka por aiwai ia ki jaka Sorkar sha ka 60 snem khnang ban pynshlur ia ka jingwan kynshew tyngka kaba heh ha ki kam pynroi hapoh ka Jylla.
Haba kren sha ki lad pathai khubor hadien ka jingialang, u Myntri ka tnad jngohkai bad nongaiktien ka Sorkar Bah Paul Lyngdoh ula ong “Ngi la mynjur ban pynjlan ia ka por aiwai ia ki jaka Sorkar ban khring ia ki project kam pynroi”.
“Kumba phi iatip ba mynta ngi don ia ka policy ha kaba ka por aiwai ia ki jaka Sorkar sha ki nongshim wai ka long 30 snem hynrei namar ka jingiohi ia ka jingdonkam bad ka jingnang wan ki jingtyrwa ia ka jingkynshew kam kaba heh bad ki project, ngi sngew ba kane ka pork a dang duna palat ban khring ia ki nongwan kynshew kam, kiba kwah ban don ka jingiohnong kaba biang ha ka jingkynshew jong ki” ula ong.
U Bah Paul ula pyntip ba ka Kynhun Myntri lyngba ka Tnad Revenue and Disaster Management kala wanrah ia ka jingtyrwa ban pynkylla bad ban pynjlan ia ka por aiwai ia ki jaka Sorkar na ka 30 snem sha ka 60 snem.
Ula pyntip “Ngi kyrmen ba kane kan pynshlur bad khring ia ki nongkynshew kam ba kin wan kynshew ha ki project kam pynroi bapher bapher ha Jylla Meghalaya khamtam ha ki kam kiba pyni dak ia ka jingkiew shakhmat bad ba don jingkyrmen ban nang pynkhlain ia ka ioh ka kot jong ka Jylla”.
Haba kylli, u Bah Paul ula ong “ (Ngi la shim ia kane ka rai namar) ngi kwah ban wanrah ia ka rukom pyrkhat, kaban pynshlur ia ki riew shimet bad ki nongkynshew kam ba kin wan kynshew ha Meghalaya”.
