Shillong, Jylliew 04 : Ka Kynhun Myntri ka Sorkar Jylla ha ka sngi Balang, kala ai jingmynjur ia ka jingtyrwa ban mang pisa sa T.30 klur na ka bynta ban siew pynkhuid lut ia baroh ki jingsiew ba dang sah jong ka Ganol Stage-I Hydro Power Project ha West Garo Hills District.
Haba kren sha ki nongthoh khubor, u Myntri Rangbah Conrad K Sangma ula ong ba kane ka project kala dep bad ka Meghalaya Energy Corporation Limited (MeECL) kala wanrah ia ka jingtyrwa ban mang pisa sa T.30 klur ban kiar na ka jingnang kiew ka pisa ba hap ban siew sha ki kynhun bapher bapher hadien habud.
“Khnang ban kiar ia ka jingnang kiew ka jingsiew, ka Sorkar mynta ka sngi kala ai jingmynjur ban mang sa T.30 klur ban siew pynkhuid noh ia baroh ki jingsiew sha ki contractor bapher bapher ki bym pat ioh pisa” ula ong haba bynrap, khatduh, ka jingpynlut ia ka project ka jan kot ia ka T.590.88 klur.
Ha kajuh ka por, ka Kynhun Myntri kala ai jingmynjur ia ka Meghalaya State Energy Conservation Fund Rules (MSECFR) 2025.
U Conrad ula ong ba kane ka song pisa ka long kongsan ia baroh ki Jylla. Ki project bapher bapher ba iadei bad ka jingtyngkai ia ka bording yn pyntrei na kane ka song.
