Shillong, Jylliew 04 : Ka Kynhun Myntri ka Sorkar Jylla ha ka sngi Balang kala ai jingmynjur ia ki kyndon ba pynkylla thymmai ia ka Meghalaya Building Byelaws 2021, ka ban pynkiew ia ka jingpyndonkam ia ki jaka ha Secretariat Hills bad European Ward sha ka 60%.
Haba kren sha ki nongthoh khubor, u Myntri Rangbah ka Jylla Conrad K Sangma ula ong ba ia ka Building Byelaw la pyntreikam lang mynta ha Secretariat Hills bad ha ki jaka ka European Ward.
“Kumta, ka jingtei ia ki iing ne building ka sorkar ha Secretariat Hills bad European Ward kan kiew noh n aka 50 % sha ka 60%. Ia kane la leh namar ba ka jaka ka duna bha ha kine ki thain bad kumta ka jingpyndonkam ia ka jaka ruh la donkam ban hap pynkiew” ula ong.
Nalor kane, u Conrad ula bynrap “…haba phai sha ki jaka paidbah kynthup ki project kum ka Wards Lake project bad kiwei ki project kam jngohkai ba ngi la pyntrei, ngi kwah ban iohi ba ngi dei ban lah pyndonkam kham heh ia ka jaka. Kumta da kata ka jingthmu ngi la ailad bad pynkylla ia ka Meghalaya Biuilding Byelaws ha kine ki jaka”.
