Ban ithuh beit noh thik tang ia ki trai riewlum kum ki ST ka Jylla
Shillong, Nohprah 20 : Ka Khasi Hills Autonomous District Council (KHADC) ha ka sngi Balang, kala mynjur ia ka Resolution ba kyrpad ia ka Sorkar Pdeng ba kan pynkylla noh ia ka Constitution (Scheduled Tribes) Order, 1950 ban ithuh beit thik tang ia ki trai paid riewlum ka Jylla Meghalaya kum ki Scheduled Tribe ha Jylla.
Haba wanrah ia kane ka Resolution, u Chief Executive Member (CEM) Bah Pyniaid Sing Syiem ula ong “Haba khmih ia ka Party XI jong ka Constitution (Scheduled Tribes) Order, 1950, kumba la pynkylla, kala ai ia ka thup jong ki Scheduled Tribe ba iadei bad ka Meghalaya kiba la ithuh kum ki Nongshongshnong ha ki Shnong ki thaw jong ka Jylla ha kaba kane ka bynta ka don jingiadei, bad haba bishar ia ka jingnang kylla ka jingdon ki trai paid riewlum ha Meghalaya ha kine ki khyndiat snem bala leit noh, ka la kylla long kyrkieh ban shong bishar biang ia ka thup bala kdew ha ka Part XI jong ka Constitution Order, 1950 haba iadei bad ka Jylla Meghalaya”.
“Mynta, kane ka Iingdorbar ka shim rai ban kyrpad ia ka Sorkar India lyngba ka Sorkar Jylla ban shim ia ka sienjam ba kyrkieh ha kaban wanrah ia ka jingpynkylla ia ka Constitution (Scheduled Tribes) Order, 1950, da kaba ithuh noh thik tang ki trai paid riewlum kum ki Scheduled Tribe ha Meghalaya” ula ong.
U Bah Pyniaid ula pan ruh ia ka jingkyrshan jong ka Iing bad kular ba un sa thoh mardor sha ka Sorkar Jylla ba kan iakren ia kane ka kam bad ka Sorkar Pdeng khnang ban pynthikna ba tang ki trai paid riewlum jong ka Jylla kin shah kynthup hapoh ka thup jong ka ST.
Haba kyrshan ia kane ka Resolution, u Nongialam ka Liang Pyrshah Bah Titosstarwel Chyne ula ong ba ha ka jingshisha ma u ruh ula dep ban aiti ia ka private member resolution halor kane kajuh ka kam ha ka 4 tarik u Nohprah.
“Nga ai khublei ia ka EC ba ka sngewthuh ia ka jinglong kongsan kane ka Resolution bad ban wanrah ia ka mynta ka sngi hapoh ka Iingdorbar ban ioh iatai bad ai jingmynjur” ula bynrap.
U Bah Titos ula ong ba kane ka Resolution ka long kaba kongsan bha bad ka dei ka jingkyrsiew thiah ia baroh ba kin ieng iada ia ka khyndew ka shyiap bad ki nongshongshnong.
Kat kum ka jingong jong u, ka jingthmu jong kane ka Resolution bala tyrwa da ma u, ka long ban kdew ia ka jingshisha ba kila don bun bha ki paid riewlum (kat kum ka thup ST), kiba ioh ia kijuh ki jingmyntoi kumba ioh ki trai paid riewlum jong ka Jylla.
“Ka jingsngewkhia jong nga ka long ba kine ki riewlum ki lah ban tjied jaka hynrei ngi pat ngim lah ban thied jaka ha ki Jylla jong ki” ula ong haba kynnoh ba ki paid Mizo kila ioh ban thied jaka ha Madanrting.
“Ngi la ju iakren bha halor ka jingrung kyrthep ki briew ba nabar ka Jylla hynrei ngi klet pat ban kren halor kane ka kam ba iadei bad ka jingshim kabu jong ki briew kiba dei na kiwei pat ki jaidbynriew riewlum. Peit ia kaei kaba jia ha Manipur hapdeng ki Meitei bad ki Kuki. Hato ngi ruh ngi kwah ia kum kane kajuh ka jinglong jingman ha Meghalaya” buh jingkylli u Bah Titos.
U MDC shimet ka Nongthymmai Bah Latiplang Kharkongor ula pyntip ba ka synjuk ki Nongsynshar Shnong ka Nongthymmai Pyllun, kila dep ban aiti teng ia ka dorkhas (ha u snem 2019) sha ka Sorkar Jylla halor ka jingdonkam ban pynkylla ia ka Constitution (Schedule Tribe) Order 1950.
Haba sot ia ka hukum jong ka Iingkashari Supreme Court jong ki snem bala leit noh, ula ong ba kane ka Iingkashari ba hakhlieh duh ka Ri kala kren shai ba u briew uba dei u Scheduled Caste lane Sheduled Tribe ha kawei ka Jylla um lah shuh ban long u SC/ST ha kawei pat ka Jylla kaba ula leit bihai shnong n aka bynta ka iohkam iohjam ne ka pule dangle.
“Mynta ka sjong ha ka Sorkar Jylla ban pynmih da ka Notification halor kane ka kam” ong u Bah Latiplang haba sot nuksa ia ka Jylla kum ka Sikkim, Mizoram bad Nagaland kiba la dep pynmih ia ka jingpynbna ban pynthikna ba tang ki trai paid riewlum kin ioh ia ki hok bad jingmyntoi ha ki Jylla jong ki.
U Dy CEM Bah Pynshngain N Syiem ula ong ba ka jingbakla bakhraw eh bala leh ha ka por ba ka Jylla Meghalaya kala ioh iala ka jong ka Jylla ka dei ka jingshim kylliang ban pyntrei ia ka Assam Rules bad Act haba bynrap “Ngi dei ban kyrpad ia ka Sorkar Pdeng ba kan buddien bad ka Sorkar Pdeng ha kaban pynkylla noh ia ka Presidential Order u snem 1950”.
Ula ban jur ruh ia ka jingdonkam ban bishar biang ia ka Land Transfer Act ban pynthikna bay m baroh ki 66 Jaidbynriew riewlum kiba don ha ka thup ST ka Jylla kin ioh ban thied jaka ha Meghalaya.
Haba jubab, u CEM ula kular ba ka Executive Committee kan shimkhia bha ia kane ka kam bad ong “Nga kyrpad ia ki Dkhot ka Iingdorbar ba kin kyrshan ia kane ka Resolution”.
