Shillong, Nohprah 20 : Ka Khasi Hills Autonomous District Council (KHADC) kala mynjur ban pynphai biang noh ia ki 21 tylli ki Shnong ka West Khasi Hills sha Mawshynrut constituency, kiba la pynkynriah sha ka Rambrai-Jyrngam ha ka jing pynbeit thymmai ia ki constituency.
Kine ki 21 tylli ki Shnong ki dei jong ki lai tylli ki Polling Station ba kynthup ia ka Misei, Langdongdai bad ka Mawsmai.
Ia kane la pyntip da u Chairman ka Joint Action Committee ki lai Polling Station Bah Jeremiia Dkhar hadien ka jingiakynduh ia u Chairman ka KHADC Bah Lamphrang Blah bad u Bah Pynshngain N Syiem hapoh ka Ophis treikam jong ki.
Lah ban kdew hangne, ki Nongialam ka JAC kila wan kiew sha Shillong naduh hynnin ka 19 tarik Nohprah ban wan ap khubor na ka Dorbar Tlang jong ka KHADC, kaba la buh ban wanrah ia ka mat iakren halor ka jingpynphai pat ia kine ki shnong na Rambrai-Jyrngam sha ka Mawshynrut constituency.
Ka KHADC kala kyrtiang dien biang ia kane ka rai ban pynkynriah ia kine ki shnong sha Rambrai-Jyrngam namar ka jingia khih jong ki paidbah na kine ki 21 Shnong kiba la pynpaw ia ka jingpyrshah kaba jur la bun bun bnai naduh ba ai jingmyn jur ka Council ia ka Delimitation ne jingpynbeit constituency thymmai.
“Ngi dap da ka jingkmen ba ka KHADC kala dep mynjur ia ka mat jingdawa jong ngi ki paidbah na ki 21 shnong hynrei ula ong ba kane ka rai ka donkam pat ban iaid sa sha ka Tnad DCA bad ban ioh jingmynjur na u Lat” ula ong.
Ka JAC kala ai khublei ia u CEM ka KHADC Bah Pyniaid Sing Syiem bad ia u Bah PN Syiem kum u Chairman ka Selection Committee ba kila sngap ia ka sur u paidbah.
“Ngi kyrpad ia u Symbud Myntri Rangbah ba khmih ia ka Tnad DCA Bah Prestone Tynsong ban iarap lem ia ngi ki 21 shnong khnang ba ngin ioh ban thep vote noh ha Mawshynrut constituency ha kane ka elekshon MDC ban wan, kumba ju long baroh shikatta” ula ong.
U Bah Jeremiia ula ong ba shen ka JAC kan sa thaw ia ki lad ki lynti ban leit iakynduh ia u DyCM Bah Prestone Tynsong.
 kala mynjur ban pynphai biang noh ia ki 21 tylli ki Shnong ka West Khasi Hills sha Mawshynrut constituency, kiba la pynkynriah sha ka Rambrai-Jyrngam ha ka jing pynbeit thymmai ia ki constituency.){kind=link}