Guwahati, Nohprah 20 : Ka Assam Youth Congress hynne ka sngi Thohdieng, kala pynlong ia ka jingiakhih kaba heh ha Dispur, Assam ban pynpaw ia ka jingpyrshah halor ka jingiap u nongkitkam ka party ha ka jingleit iatur pyrshah sha Raj Bhavan myn ha ka 18 tarik Nohprah.
Da ki spah ngut ki dkhot ka Youth Congress ba iakhih, kila dawa ban ai ka jingbishar kaba hok ia u nongkitkam ka party ba khlad u Mridul Islam, uba iap na ka jingshah siat tyndong lyer pynsat khmat ha ki Pulit.
Ha kane ka jingiakhih, ka Youth Congress kala pyrta slogan pyrshah ia ka Sorkar BJP kiba ong “Leit phai noh sorkar BJP, Leit noh Himanta Biswa Sarma, Leit noh Pulit ka Assam bad kiwei kiwei”.
Ki nongiakhih kila pyrshang ban ialum ha kaban ia iaid paidbah hynrei ki Pulit kila khang bad khlem ai jingbit satia. Kine ki nongiakhih kila pyrshang hynrei ban thombor ia ki jingker ki Pulit hynrei ki Pulit kila lah ban tehlakam.
Hadien katto katne por, ki Pulit kila rah ia ki nongiakhih kynthup ia u President ka APCC Bhupen Borah nalor kiwei kiwei ki nongialam sha thanad.
Shuwa kane, ki Pulit ka Assam hynne ka step kila setkut ia u Nongialam ka All India Youth Congress Uday Bhanu Chib hapoh ka hotel ha Guwahati.
Une u Nongialam ka Youth Congress ula wan sha Guwahati ban iashimbynta ha ka jingiakhih bala pynlong da ka Assam Pradesh Congress Committee (APCC) hynne ka sngi Thohdieng.
Ki Pulit kila set ia une u nongialam ka AIYC ha kawei ka hotel kaba don ha ka thain Manik Nagar bad la buh ia ki Pulit ban pahara ia kane ka hotel ba un nym ioh mih.
