Mynjur ka KHADC ban ai Medical Insurance ia ki 800 ngut ki Nongtrei haba pang ba shitom

0
42

Shillong, Nohprah 13: Ka Executive Committee (EC) jong ka Khasi Hills Autonomous District Council, hynne ka sngi Balang kala ai jingmynjur ban ai ia ka Medical Insurance ne jingiarap bai sumar ia ki 800 ngut ki nongtrei jong ka KHADC haba ki leit ban phah sumar haba ki pang ki shitom.

Haba iakren bad ki nongthoh khubor hadien ba la wai ka jingialang jong ka EC, u CEM ka KHADC Bah Pyniaid Sing Syiem ula ong, watla ka Council kala don mynta la 70 snem tam, hynrei ki nongtrei jong ka Council kim shym la ioh ia kano kano ka jingiarap haba ki leit sumar haba ki pang ki shitom, kumta ka EC kala shim ia ka rai ban pyntreikam noh da ka Medical Insurance da kaba iasoi iaka jingiatehkular bad ka State Bank of India ban pyniaid shakhmat ia katei ka kam.

Ula ong, kumba 800 ngut ki nongtrei jong ka KHADC, kin ioh iaka jingiarap haba ki leit ban shah sumar ha ki hospital bad ka Council kan pynlut kumba T.15 lak ha ka shi snem na ka bynta ka Medical Allowance jongki nongtrei baroh bad ka SBI kan ai ia ka Special Group Insurance Medical Package kaba long ka lad jingiarap ia ki nongtrei katkum ka rta kaba ki don.

U Bah Syiem ula ong ba ia ka jinglut jingsep yn bei tyngka da ka KHADC bad ka jingmang Insurance bai sumar ia ki nongtrei kan long kumba T.3 lak haduh T.7.50 lak tangba kane kan shong katkum ka rta jong ki nongtrei bad la bthah iaka SBI ba kadei ban iatehlok bad ki Hospital kiba don hapoh ka jylla bad shabar ka jylla khnang ba kan ym don kano kano ka jingeh ia ki nongtrei ka Council haba ki leit ban phah sumar.