Yn kyrpad ia ka Sorkar Pdeng ban pynsangeh noh ia ka KPM project
Shillong, Nailar 26 : Ka Iingdorbar Thaw Ain ka Jylla ha ka sngi Balang, da kawei ka sur kala ai ka jing mynjur ia ka Resolution ba pyrshah ia kano kano ka rukom tih uranium bad ban sain ia une u marpoh khyndew hapoh ka Jylla haba rai ruh ban kyrpad ia ka SorkarPdeng ban khangdam lut ia baroh ki kam ba iadei bad u uranium, kynthup ka KPM project.
Ia kane ka resolution ka Sorkar la wanrah da u Myntri Rangbah ka Jylla Conrad K Sangma bad la kyr shan da baroh 60 ngut ki MLA ka Iingdorbar Thaw Ain.
Haba wanrah ia ka resolution, u Conrad ula pynpaw ba ki jaka ki riewlum ha Meghalaya ki dei kiba hap hapoh ka jingkhmih ka Sixth Schedule, ha kaba ia ka khyndew ka shyiap la bat da ki Shnong, ki Raid, ki Hima, ki Kur bad ki riewshimet bad ka jingai ne pyndonkam ia ki jaka ki hap hapoh ka jingkhmih jong ki Autonomous District Council.
Ula kdew ruh ia ka hukum ka Iingkashari Supreme Court ba 3 tarik Naitung, 2019, ha ka mukotduma ka All Dimasa Students Union, kaba pynksan ba ki trai jaka ha Meghalaya ki long trai ia ka khyndew ka shyiap bad ki mar kiba don hapoh jong ka, kynthup ki marpoh khyndew.
U Myntri Rangbah ula ong ba ki par uranium ki dei kiba don ha Domiasiat, Wahkyn bad Lostoin ha West Khasi Hills bad South West Khasi Hills, ka jaka kaba la tyrwa ban pyntrei ia ka project Kylleng-Pyndengsohiong-Mawthabah da ka UCIL ban sei ia u uranium da ka open-cast bad ban seng ia ka karkhana ban saindur ia une u marpoh khyndew.
U ong ba kane ka thain ka dei kaba ioh ia u slap uba jur bha, kaba sharing, kaba jur ka jingtwa khyndew bad ka dei ka jaka ba don ia ki khlaw kiba long ki tyllong um jong ki wah bad ki wahduid kiba donkam na ka bynta ka umbam umdih, ka rep ka riang bad ka kamai jakpoh, bad ka jingkhang lad ia ka jingtuid ki jaboh jabain ka dei ka bym lah ban pynthikna, ka ban pynhun ia ki shnong ki thaw kiba shah ktah.
Ka resolution kala pynpaw ruh ia ka jingpyrshah ba khlem sangeh na ki bor synshar nala tynrai, ki district council, ki samla pule bad ki kynhun sengbhalang, ka jingbym don ka jingmynjur kaba laitluid, kaba la ai lypa bad kaba la pyntip lypa bad ka jingshisha ba ym pat shym la don ba ai ia ka mining lease ban tih uranium.
Kala kdew ruh ia ka Office Memorandum jong ka Environment Ministry ba 8 tarik Nailur, 2025, ba pynlait ia ka jingtih ia ki Atomic Mineral na ka jingiasyllok ia u paidbah, haba pynkynmaw ia ka jingkren u Myntri Khnnah ka Atomic Energy dang shen ha Shillong ba kam pat don ka jingshim rai halor ka jingtih uranium hapoh ka Jylla.
Ka Iingdorbar ka rai ban buh ha ki jingthoh ia ka jingpyrshah u paidbah ia ka jingtih uranium bad ka jingsain ia une u mar haba kyntu ia ka Sorkar Pdeng, ka Department of Atomic Enerhy bad UCIL ba kim dei ban ai jingbit ne buddien ia ka jingtih uranium ha Meghalaya kynthup ka project Kylleng-Pyndengsohiong-Mawthabah.
Haba kren halor ka resolution, u Conrad ula ong “Ka Meghalaya ka don bun bha ka par uranium bad ki kam bala leh ha ki snem bala leit da ka Sorkar India ka dei kaba la pyrshah jur da ki paidbah. Ngi la iohi ia ka jingktah ka jingtih uranium ha kylleng ki bynta jong ka Ri, kaba la ktah jur ia ka koit ka khiah ki briew hajan ki par”.
“Kam don satia ka jingshai halor ka nongrim jong ka Sorkar, ka Iingdorbar bad ki paidbah. Ngi sngew ba dei ban wanrah ia ka resolution ba phah ia ka khubor ha kawei ka sur ba ka Meghakaya, ki nong shongshnong, ka Sorkar bad ki Nongmihkhmat ba jied u paidbah, ki pyrshah ia kano kano ka rukom tih uranium lane sain ia une u mar” ula ong.
“Kane kadei ka resolution kaba kongsan bha, ym tang ia mynta hynrei na ka bynta ki pateng ban wan. Ngi lah ban don ki jingiapher ha ka jingsngew sain pyrthei, hynrei haba poi sha ka jingiada ia ki briew jong ngi, ngi long kawei. Ngi dei ban mynjur da kawei ka sur bad phah ia ka khubor ba ka Meghalaya ka iatylli pyrshah ia ka jingtih uranum ha kano kano ka dur” ula bynrap.
Jan baroh ki MLA kila ai jingkren ban kyrshan ia kane ka resolution
U Lamphang hadien ula pynbna ba ia kane ka resolution la mynjur da ka Iing baroh kawei.
