Shillong, Naitung 31: Ka Sorkar Bangladesh kala mynjur ban tei noh shen ia u motdur ba shi rynnieng jong u Khla Wait ka Bri Hynniewtrep Tirot Sing Syiem, ban sa pynieng noh ha Indira Gandhi Cultural Centre (IGCC) kaba don ha Dhaka, Bangladesh.
Ia kane la pyntip da u Myntri ka tnad Arts and Culture u Bah Paul Lyngdoh haba iakren bad ki nongthoh khubor hynne ka Lah Sngi U Blei, lyngba ka Video Conferencing.
U Bah Paul ula ong ba u High Commissioner jongka ri India sha Bangladesh u Pranay Verma ula phah iaka shithi haka 25 tarik u Naitung bad la mynjur iaka jingtyrwa jong ka sorkar Meghalaya ban tei ia u mot sahnam jong u Tirot Sing Syiem, uba long u nongiakhun laitluid bad u nongialam jong ki paid Khasi ha kaban iakhun pyrshah iaki phareng bad uba la khlad noh ha Dhaka.
U Verma ula pyntip baka High Commission jongka India ha Dhaka kala dep ban shimkhia ia katei ka jingtyrwa bad ka Ministry of External Affairs bad ICCR bad kala pynpaw iaka jingkongsan ban pynieng ia utei u motdur ha IGCC, Dhaka.
Ha ryngkat bad ka jingiahap bad ka jingrakhe iaka Azadi Ka Amrit Mohotsav ha Bangladesh, ia ka Library jongka IGCC kaba don ha Dhanmondi kan long ka jaka kaba biang tam eh ban pynieng ia u notdur ba shi rynnieng jong u Tirot Sing, la ong u Verma ha ka shithi kaba la phah sha u Bah Paul.
U Bah Paul Lyngdoh ula ong ba ka ophis jongka High Commissioner jong ka ri India kala ai jingmut ruh ba ia kaatei ka Library ha Dhaka yn pynkylla kyrteng noh sha ka Tirot Sing Memorial Library kum shi bynta ban pynsaphriang ia ki khana bad ki histori jong une u khla wait khnang ba ki khynnah kin tip shaphang jong u.
Ula ong ba ka sorkar jylla kana sa iatreilang bad u Director jongka IGCC ha Dhaka na ka bynta ban pynpoi ia u mot sahnam bad ban pynieng ha katei ka jaka bad hadien kane yn sa pynbud pat da kaba pynlong iaka jingialang ia kaba yn wan ban iashimbynta da ki heh ki haiñ na ka jylla Meghalaya.
“Ngi don jingthmu ban pyndep ia kane ka kam baroh hapoh jong u Naiwieng ne Nohprah mynta u snem” ong u Bah Paul.
Ula iathuh ruh ba ka sorkar kan sa pan ruh ia ka jingiarap na u Prof David Syiemlieh ban ioh ia baroh ki kot ki sla kiba iadei bad ki jingtip ha kaba iadei bad ka jingshah kem bad ka jingiap jongu Tirot Sing Syiem kiba ula lum na London khnang bay n ioh ban buh haka IGCC Library.
Lah ban kdew hangne ba ha u Naiwieng 2019, u Myntri Rangbah ka Jylla Conrad K Sangma ula ialam ia ka Kynhun ki Myntri bad ki heh Ophisar ban leit iuhkjat ha ka phatok ba set ia u Tirot Sing ha Dhaka bad ula pyndon burom ruh ia une u khla wait ka jaidbynriew Hynniewtrep.
 kaba don ha Dhaka, Bangladesh.){kind=link}