Guwahati, Nailar 09 :Ka kynhun Myntri ka Assam hynnin ka sngi Nyngkong ka la mynjur ia ka mang tyngka ka ba T.123 klur na ka bynta ban tei pat ia ki iing ki sem ki ba la shah pynjulor na ki jingshlei um ba dang shen.
U Myntri ka sorkar Assam, u Jayanta Malla Baruah ha ba pynshai ha ka jingialang ka kynhun myntri u la ong ba kawei pat kawei ka longiing ha ki thain jaka lum ki ba ki iing ki sem jong ki, ki la shah pynjulor noh namar ka jingshlei um ba dang shen kin ioh pdiang ia ka jingiarap ka ba T. 1lak bad T.95,000 ia kawei pa kawei ka longiing ba shah pynjulor ha ki jaka them.
Kawei pa kawei ka longiing jong kito ki ba don ia ki iing ba la shna bha ki ba la julor mar shiteng kin ioh ia ka jingiarap ka ba T.5200 bad T.3200 na ka bynta ki longiing ki ba don ia ki iing ba la shna da ki siej bad u skum.
Na ka bynta ka jingiap jong ki jingri (masi), na ka liang ka sorkar kan ai ia ka jingiarap ka ba T.2100 na ka bynta kawei ka masi.
Na ka liang u Myntri Rangbah (CM) ka Assam, u Himanta Biswa Sarma dang shen u la ong;“Ki la don haduh kumba 25670 tylli ki iing ki sem ki ba la shah pynjulor phom bad 2.78 lak ki iing ki ba la shah pynjulor mar shiteng ha kane ka jingshlei um ba dang shen.
Ngin ai ruh ia ka jingkyrshan na ka bynta kito ki longiing ki ba ki iing ki sem jong ki, ki la shah rah noh ha ka um.
Hapoh ki 15 sngi ki ban wan yn pynkhreh ia ka list halor kane.Kan don ka jingbishar bniah ka ba 10 percent na ka bynta ki nong ioh jingmyntoi ha kawei pa kawei ka district.Ngin pynlut haduh kumba T.400 klur na ka bynta kane.”
