Shillong, Nohprah 03 : Ka Iingkashari Meghalaya High Court kala bthah ia u Officer-in-charge ka Mawsynram Police Station ban pyntip ia u Syiem ka Hima Mawsynram halor ka jingsahteng ka mukotduma Krem Mawjymbuin bad ban pynthikna ba u dei ban wan mih na thung ia u nongiasaid ain ha ka sngi ban shong bishar biang ia ka kam.
Ka Iingkashai kala pynpaw ba wat hapdeng ka jingphah notice ha ka 3 tarik Risaw 2025, kam shym la don satia kano kano ka jingmihkhmat na ka bynta u Syiem. Ia kane ka jingbthah la ai ban lah pyndep ia ki kam ba donkam ban leh kat kum ka jingbthah ka hukum ka Division Bench.
Kane ka mukotduma ka dei halor ka jingujor jong ka Yatra haba iadei bad ka krem Mawjymbuin ha Mawsynram.
“Kane ka Iingkashari ka pynpaw ba ka jingwan mih u Syiem ka long kaba donkam khamtam haba don ka jingbthah jong ka Division Bench ban pyndep ia kane ka kam. Namar kata, la bthah ia u Officer-in-charge ka Mawsynram Police Station ba un pyntip ia u respondent No.10 (Syiem ka Hima Mawsynram) ia ka jingsahteng kane ka mukotduma bad ban ai ia ka copy jong kane ka hukum ka ban sa ai da ka Registry, ban wan mihkhmat, lane thung ia u nongiasaid hashuwa ka sien shong ban wan” ong u Justice HS Thangkhiew ha ka hukumba pynmih ha ka sngi Ba-ar.
Nalor kane, ka Iingkashari ka pynpaw ia ka jingsngewkhia halor ka jingbym don ki Pulit hapoh ka krem Mawjymbuin, watla ki la don ki hukum ba kin pahara, bad khmih lynti ba ki borkhmih kin pynthikna ia ka jingpahara ha kane ka jaka.
“La khmih lynti ba kat kum ka hukum jong kane ka IIngkashari, dei ban buh ia ki bor pahara ha kane ka jaka” ong ka hukum.
