Nongstoin, K’lyngkot 30 : U MLA barim ka Mawshynrut Francis Pondit R Sangma bad u para Jorminath R Sangma, kila ujor da ka ejahar ia 5 ngut ki briew halor ka jingkynnoh ba ki donkti ban tih beain ia u dewiong ha ka thain.
Kine ki san ngut kiba shah mudui ki kyrteng u Rosten R.Sangma na ka shnong Riangdem, Nengnang R. Sangma na Khallu, Wailing N Marak, Geren M Sangma bad u Dewing M Sangma na Bakchung.
Ha kane ka ejahar bala aiti sha u Superintendent of Police ka West Khasi Hills, une u MLA barim ula kynnoh ba kine ki san ngut ki briew ki dang iai bteng ban tuh dewiong n aka bynta ka Agal Hillock Riangdim, Milsam Hills bah Bappa Hill lock bad ia une u dewiong la pynkit sha Shallang bad Jaddigittim ban pyniaid iew.
Nalor kane, ula kynnoh ba kine ki briew kila pynieng ruh ia ka khyrdop lum khajna ha surok PWD na Riangdim sha Rajagolla, kaba long beain kat kum ka ain.
Haba iaren bad u nongthoh khubor, u Francis ula iathuh ba u ju kren ia kine ki briew man ka por ba kim dei ban iatih dewiong beain hynrei la kynnoh ba kine ki briew kim pynsngap satia ia u.
Halor ka khyrdop, u iathuh ba u ju kren ruh ia kane sha ki bad pyntip ba ka Sorkar kala khang pyrshah ban pynieng khyrdop ha ki surok ka PWD hynrei ia kane ruh kim shym la pynsngap satia.
U ong ba dei halor kane ka nongrim ba ma u (Francis) bad u para, kila leit ban mudui syndon da ka ejahar. U ong ba lada ki Pulit kim leh eiei ia kane ka kam, ma u lem bad u para kin sa leit tied ia ka jingkhang jong ka Iingkashari.
