Shillong, Nailar 24 : Ka Jaintia Students’ Union (JSU) kala mudui ia ka Public Interest Litigation (PIL) hapoh ka Iingkashari Meghalaya High Court ba tynjuh pyrshah ia ka environmental public hearing na ka bynta project tih mawshun ka Shree Cement Limited ha Lum Syrman, Elaka Nongkhlieh.
Ka kynhun ba ialam da u Education Secretary Bocheru Mi Pohsnem bad u General Secretary Neilkee Mukhim, kila mudui ia ka PIL pyrshah ia ka hearing ba long ha ka 31 tarik Naitung, 2026, kaba ka seng ka niew kum ka kam leh thok bad ba pynap da ki bor kiengatiar.
Kat kum ka jingong ka JSU, kane ka sienjam kala wan jia hadien ba kala pyndep lut ia baroh ki lad iakren bad ki bor Sorkar.
“Wat hapdeng ki dorkhas bad ki ejahar ba bun tylli bala aiti sha ki bor district bad ki pulit, ka Sorkar jylla kam shym la lah ban shim ia ki lynti ban pynbeit lane ban pynsangeh ia ka kam ai jingbit” ong ka JSU ha ka kyrwoh.
Kala bynrap ba katba ka jingujor hakhmat ka Meghalaya Human Rights Commission (MHRC) bad ka National Green Tribunal (NGT) ki dang sahteng, ki bor khmih ki dang bteng ban leh matlah ia kane ka kam.
Haba kdew ia ka nongrim jong ka PIL, ka JSU kala kynnoh ba kane ka public hearing la pynlong tang hapoh ka 46 minit ha kaba bun ki kynhun ba dei hok ba don bynta bad ki trai jaka, kila shah khang ban iashimbynta.
Kala kynnoh ruh ia ka jingdon bynta lang jong ki Pulit, haba pynpaw ba ha ka jaka ban leh eiei pyrshah ia kito kiba pynjulor ia ki nongkynti paidbah, ki Pulit kila pyndonkam pynban da ki tyndong lyer pynsat khmat pyrshah ia ki samla trai muluk ba jai jai bad kila pynkylla ia ka ejahar ba kan tlot, pynngat ha ki kyndon ba lah ban bah jamin ban iada ia ki nongthombor.
Haba buh ia ka jingaipor, ka JSU kala ong ba ka jingleit tied ia ka jingkhang jong ka High Court ka dei ka lad ba khatduh jong ka.
