Mudui ki Rangbah shnong ka Sohra sha u Lat | Kynnoh pyndonkam bakla ka KHADC ia ka bor

Shillong, Jylliew 15 : Ki Rangbah Shnong bad ki riew rangbah ka Hima Sohra kila iakynduh ia u Lat ka Jylla CH Vijayashankar ha ka sngi Nyngkong, bad kynnoh ba ka Khasi Hills Autonomous District Council (KHADC) kala “pyndonkam bakla ia ka bor” da kaba pynslem ban ai jingithuh ia u Syiem bala jied da u paidbah.

Hapoh ka jingialam u Pa’iem Laborious Manik Syiem, u nongaibuit ka Synjuk ki Khlieh Nongsynshar Shnong ka Hima Sohra bad Syiem barim ka Hima Mylliem, kane ka kynhun kala iathuh ba kila “leit iakynduh ia u Lat ka Jylla ban pynpaw ia ki nongrim ki jingkam jong ngi ba ngi la dep jied ia u Syiem ka Hima” hadien ba ka KHADC “kam shym la burom lane snap ia ki jingdawa”.

Ka jingthmu, u ong ka long ban “pyntip sha u ia ka jingbym suidniew jong ka Executive Committee ka KHADC haba iadei bad ka jingdawa jong ki, bad la kyrpad ruh ia u ba un khmih bniah ia ki jingleh jong ka KHADC”.

Ka kynhun ka iathuh ba ki jingai jingthoh halor ki jingdawa, kila shu sahkut naduh u bnai Naiwieng 2025.

“Ngi la pyntip sha District Council bad pyndait ruh ia ki kot ki sla ba iadei bad ka elekshon jong ka Hima Sohra bad ka rukom pyniaid kam na ka Kur….tad haduh ban da thung ia u Syiem ba pura ka Hima Sohra. Hynrei baroh kila shu kut tang ha ka ktien tad haduh mynta ngim shym la ioh satia ia kano kano ka jingtip na ki”.

Halor ka jingsngap jar ka KHADC, u Pa’iem Laborious ula kynthoh “Ngi shim ba kane ka jingsngap jar ka dei ka jingmy”jur”.

Ka kynhun ka ban jur ba u Syiem u dei ban bud ia ka riti ka dustur.

“Ha Hima Sohra, ka elekshon ban jied ia u Suiem ka Hima la leh kat kum ka Act jong ka District Council bad khamtam ka riti ka dustur. Ka ju long beit da u briew uba hiar pateng na ka shnong, ka raid jong ka Hima Sohra bad ha kajuh ka por la shai kdar ba u dei ban bat ia ka niam tynrai kaba dei ka dustur jong ka Hima Sohra”.

Kila pyrshah ia u briew bat hung ka KHADC, bad ong “Utei u briew bala wanrah da ka District Council…u dei u briew uba u Kpaieid jong u ha kine ki 100 snem u don ha Mairang, bad um don iing shuh ha Hima Sohra. Um shym la sah shuh ha ka shnong bad ha kajuh ka por ula long Khristan kaba long pyrshah ia ka ain jong ka Hima Sohra”.

Haba khot ba ka dei “ka jingpyndonkam bakla ia ka bor da kane ka EC ba mynta ka KHADC kala iaid palat liam kaba la pynbor ia ki ban wan iam hakhmat u Khlieh ka Jylla” ong u nongaibuit haba iada ia ka synshar khadar nala tynrai ka Hima Sohra.