Nongpoh, Nailur 26 : Ka Synjuk ki Rangbah Shnong ka Border Area Raid Nongtung hynne ka sngi, kala leit ban mudui hakhmat u Deputy Commissioner ka Ri-Bhoi, halor ka jingkhih khohreh jong ki jaidbynriew Karbi bad Nepali ban tuklar ia ka kam iapynbeit pud ha Block-II.
Ka Synjuk kala aiti da ka jingthoh sha u Deputy Commissioner ba pyntip ba ki Karbi bad ki Nepali kila pynlong ia ki jingiakhih halor ki kam pynbeit pud wat hadien ba la don ka jingiapynbeit ba ym shah shuh ban pynlong ia kino kino ki jingiakhih ha ka thain Block-II.
Ka Block-II ka dei kawei na ki hynriew tylli ki jaka kiba la don ha ka thup iapynbeit pud jong ka wat ka ba-ar hapdeng ka Sorkar Meghalaya bad Assam ka ban sa sdang shen. Ka Sorkar Jylla hynne ka sngi nyngkong, kala pynmih ia ka jingpynbna bala thaw ia ki Regional Committee ban pyniaid noh shakhmat ia ka jingjurip khappud.
Lah ban pynpaw hangne, ka Sorkar Meghalaya bad Assam kila shim rai dang shen ban ym shah shuh ban pynlong ia kino kino ki jingiakhih ha ka thain Block-II hynrei la kynnoh ba ki Karbi bad ki Nepali kila pynkhein ia kane ka rai bad la kynnoh ruh ba wat ki bor District ka West Karbi Anglong ne Ri-Bhoi District kim shym la tuklar ia kane ka kam.
U President ka Synjuk Bah Blikstar Sohtun u pyntip ba ki paid Khasi ba sah ha Block-II kila pynpaw ia ka jingsngewkhia halor kane ka jingleh ki paid Karbi bad ki Nepali, kaba la ktah ia ka shongsuk shongsain ki paidbah ha ka thain.
“Ngi la kyrpad ia u Deputy Commissioner ka Ri-Bhoi ba un iakren lem bad ki bor District ka West Karbi Anglong ba kin khang ne ym ailad ia ki Karbi bad Nepali ban pynlong ia kino kino ki jingiakhih halor ki kam pud kam sam katba ka jing iakren iapynbeit pud ka dang iaid shakhmat” ula ong.
“Lada kam don ka jingtehlakam, ngi ruh ki Khasi ngim banse ban pynlong ia ki jingiakhih namar ngi ruh ngi don shibun ki mat ba hap ban iakren halor ki kam pud kam sam. Mynta ngi sngap jar ba ngi burom ia ki jingbthah ne hukum na ki ar sorkar khnang b aka kam iapynbeit pud kan iaid beit iaid ryntih” ula bynrap.
U Bah Blikstar ula pynpaw ia ka jingkyrmen ba u Deputy Commissioner ka Ri-Bhoi un shimkhia ia kane ka kam lem kumta ki paid Khasi ruh kiba sah ha Block-II kin shim lang ia kajuh ka lynti jong ki jingiakhih.
