Shillong, Naitung 05 : Ka Khasi Students Union (KSU) ha ka sngi Balang, kala leit ban ujor hakhmat u Divisional Forest Officer (DFO) ka East Khasi Hills pyrshah ia ki briew ba kynnoh shong shnong beain ha Mahadev Khola.
U President ka KSU Laban Circle Reuben Najiar ha ka kyrwoh ula ong ba kat kum ka jingtip ba ioh lum da ka seng, ka Tnad Forest kala ai jingbit ia ki riew ngeit Hindu tang ban pynieng ia ka mandir ha Mahadev Khola ban leh niam.
Hynrei, ha ka jingleit jurip ia kane ka jaka, la seng kala lap ba ki don palat 30-40 tylli ki longiing bad ki dukan kiba dei jong ki bar Jylla kila mih ha kane ka jaka khlem da don ia ki kot ki sla ba donkam.
Kine ki nongshong beain kila pyntuid ruh ia ki jaboh jabain sha ka wah. Nalor kane, kane ka jaka kala kylla long ka ktem jong ki nongdih droks bad bun ki kam lute kila jia ha kane ka jaka na ka por sha ka por” ula ong.
U samla Reuben ula pyntip ba u DFO ula pan por ban pynlong ia ka jingleit jurip sha Mahadev Khola ban leh eiei pyrshah ia kine kiba shong beain.
Pule lang ia kane: Rai ka KHADC, Khlieh Nongsynshar bad Sengbhalang ban pyrshah jur ia ka UCC
