Shillong, Lber 10 : U Nongialam ka Liang Pyrshah Mukul Sangma ula bthah ia ki Pulit ba kin register da ka case pyrshah ia u MLA barim Estamur Mominin halor ka jingpynphriang iaka video bala ring ha ka 9 tarik Lber, haba kynnoh ba ki don ki jingkren ia ki kyntien pynshit kiba lah ban nang aiding hapdeng ka jingiakynad kaba mih na ka jingiashim bynta ki bar jylla ha ka elekshon GHADC.
Ha ka ejahar bala mudui ha Phulbari Police Station ha ka sngi Ba-ar, u Mukul, uba dei ruh u Nongialam ka TMC, ula ong ba ka video ka pyni ia u Mominin uba dang ai jingkren ha ka jingialang hadien ba u shah shoh ha phyllaw ka Ophis u Deputy Comissioner ka West Garo Hills ha katei hi ka sngi.
U Mukul ula ong ba ki jingkren bala kren da une u MLA barim, lehse kala shu mih ne da ka jingthmu ban pynshit ia ki katto katne ki kynhun bad aiding ban mih ka jingkulmar hapdeng ki kynhun ha ka thain.
Une u Myntri Rangbah barim ula bynrap ba ka video kaba pynmih ia ka kyrteng jong u (Mukul) bad arngut kiwei pat, ka ong ba kila ai jingmynjur ia ka jingthep kyrteng u Mominin bad ka jingiashimbynta ki bar jylla-kaba ula kyntait war.
Ula ong ba kum u briew ba bat ia ka kam shakri paidbah, kane ka jingkam ka lah ban aiding ia ka jingsngew ban buhshun pyrshah ia u bad ka jingleh ia ki kam bymman da kawei ka jaidbynriew pyrshah ia kawei pat.
“….Haba kut jong ka jingkren ha kane ka video, ka kyrteng jong uba soi harum nalor ki arngut ki nong mihkhmat paidbah kila shah pynmih kum kiba ai jingmynjur ia ka jingthep kyrteng u Estamur Mominin kaba mut ruh ba ki mynjur ia ka jingiashimbynta ki bar jylla ha ka elekshon District Council, ia kaba kam dei kaba shisha namar kam pat ju don ka jingiakren ne ai jingmynjur da uba soi kyrteng harum lane kino kino ki nongmihkhmat b aula buh” ong u Mukul.
U Mukul ula ong ‘Watla na ki video bala pynsaphriang, kam shym la don pat kino kino ki dur ne video ban kyrshan ia ki sakhi ia mynta ki ban pyni ia ka jingheh ka jingialum paidbah, hynrei kala paw na ki sur kiba mih ba ka jingdon dur ha kane ka jingialang ka long palat ia ka 10 ngut.
U Mukul ula kyntu ia ki Pulit ba kin leh eiei kat kum ka kyndon 192,196, 353 bad 57 jong ka Bharatiya Nyaya Sanhita lane kino kino ki kyndon kiba sngew iahap.
