Shillong, Jylliew 18 : Ka Liang Pyrshah Voice of the People Party (VPP) kala ujor da ka ejahar pyrshah ia u Myntri Sorkar bad Nongialam ka NPP Rakkam A Sangma halor ka jingkynnoh ba u kren pyniashrut Jaidbynriew ha ka por ialap elekshon Lok Sabha ba dang shu dep.
Ia kane ka ejahar la mudui da u Finance Secretary ka VPP Danny Langstieh bad la aiti sha u Superintendent of Police (SP) ka East Khasi Hills hynne ka sngi Ba-ar.
U Bah Danny ula kynnoh ba shuwa ka elekshonn Lok Sabha 2024, ka video kala saphriang paidbah ha kaba la iohi bad ioh sngew ba u Myntri ha ka por ialap elekshon, ula kynthoh jur pyrshah ia ka VPP bad kynnoh ba kane ka Party kan sa pynjot, pyniap bad nion bein ia kiwei ki jaidbynriew.
“Ka jingkren ia kum kine ki kyntien ba pyniashun, jingiashrut jaidbynriew kam dei tang kaba bakla bad beain hynrei kaba buh jingma ruh namar ka lah ban wanrah ia ka jingbym shongsuk hapdeng ki jaidbynriew bad lah ban pynmih ia ka jingia kynad, ka thma jaidbynriew bad kam umsnam” ula ong ha ka ejahar.
Lah ban kdew ba u Rakkam A Sangma uba bat ia ka tnad Pule Puthi, Border Area Development bad General Administration, ha ka sngi Nyngkong, ula kyntait war ia kane ka jingkynnoh ba ula kren pynshit Jaidbynriew ha ka por ialap elekshon ha Ri-lum Garo.
