Shillong, Nailar 18: Ka Jaintia National Council (JNC) Western Zone, ka la ujor daka ejahar sha ki pulit ka Jowai Police Station pyrshah ia kawei ka facebook page kaba ai kyrteng “Nongkyndong Daily” halor ka jingkynnoh ba ka pynsaphriang ia ki khubor lamler bad ki jingthoh kiba pynjah burom ia u President bad iaka Council.
Ha ka jingujor, u President ka JNC Western Zone, u Hamehi Bamon, u la kyntu ia u Officer-in-Charge ka Jowai Police Station ban register case pyrshah ia ka page “Nongkyndong Daily” na ka bynta ka jingthoh (post) kaba la pynmih ha ka 16 tarik Nailar 2026.
Katkum ka jingujor, katei ka jingthoh (post) ka la kynnoh ba “u President ka JNC u la kyrpad ia ki paidbah ka Jaintia Hills ba kin ai ka jingkyrshan kaba pura ia ka party NPP ha kane ka elekshon MP shiteng samoi”.
“Ka page kala pynmih ia ka khubor lamler. Kane ka jingkren ka dei kaba thok bad kaba la shu shna. Ka JNC ka dei ka seng ba khmih ia ka bha ka miat ka imlang sahlang bad jong ka jaidbynriew Jaintia bad kam kyrshan ia kano kano ka seng sain pyrthei”, ong u Bamon.
Ka JNC ka la kynnoh ba ka jingthmu jong ka jingpynmih khubor lamler ka long “ban ialam bakla ia ki paidbah, ban pynsniew ia ka nam jong ka JNC bad ia u President bad ban wanrah ia ka jingsngew iapher ha ka imlang sahlang ha ka por elekshon.”
Kala ong ba ka post bala pynmih ha Page “Nongkyndong Daily”, “la pynphriang paidbah bad ka lah ban wanrah huri hura.
U Bamon u la pyndait lang ia ka dur (screenshot) jong ka post ba la kynnoh kum ka sakhi. “Namar kata nga kyrpad ia phi ba phin sngewbha ban register da ka FIR pyrshah ia ka page ‘Nongkyndong Daily’ bad ban leh ia kaba donkam katkum ka ain”.
