Tura, Nohprah 04: Ka Garoland State Movement committee (GSMC) ha ryngkat ki nongtrei monsngewbha ka South West Garo Hills, kila ujor da ka ejahar pyrshah ia ka Mahendraganj Forest Range namar ka jingjur palat ka jingkhaii tuh ia ki dieng napoh ka District sha Assam.
Ia kane ka ejahar la mudui hynne ka sngi Nyngkong haba kdew ruh ba kane ka Forest Range kala donkti ha ka jingkhaii tuh ia ki dieng na South Garo Hills sha Assam da kaba ai TP.
Kila kdew ruh ba ka TP bala ai ka dei tang ban khaii ia ki dieng tang hapoh ka Jylla ym shabar jong ka Jylla hynrei ki heh ka Tnad Forest kila shu ai TP katba lap bas hem khlem da wad bniah ia ka kam.
Ka jingkhaii tuh ia ki dieng sha Assam kala iaid lyngba ka Mirzumla, Aidoba, Jhanjoni junction, kila kdew.
Ha ka 30 tarik Naiwieng kumba 2:30 baje janmiet hajan Zikzak POP, ka GSMC ka pyntip ba ki don bun tylli ki bolero pickup kiba kit dieng da kaba thmu ban khaii ruh sha Assam.
Kine ki bolero ki dei kiba don u nombor ML14-8958, ML14-9692, ML08-F-9472 bad ML08-A-7129.
La iathuh ba ha ka jingtohkit ia kine ki kali, la shem ba ki dei kiba thmu ban khaii tuh sha Assam bad kumta la pyntip mar mar ia kane ka kamsha ki Heh ka Mahendragank Forest Range bad la kurup noh ia kine ki markhlaw.
Ha kajuh ka por, kane ka seng kala kyntu ia ka GHADC ba kan leh eiei pyrshah ia ka jingkhaii tuh ia ki dieng bad ia ki heh jong ka Mahendraganj Forest Range.
