Shillong,Nailur 19 : Kawei ka Booth Level Officer (BLO) ka South Shillong Constituency, ka la mudui da ka ejahar pyrshah ia kawei ka Longiing namar ka jingpynsaphriang khubor lyngba ka Whatsapp ba kynnoh baka dei ka menshukor.
Ine i BLO i dei i Kong Banrikynti Ryntathiang iba dei i Nongtrei ka Meghalaya Legislative Assembly bad iba la shah thung kum i BLO ban leit lum ia ki jingtip na ki thliew Iing kat kum ka jingbthah jong ka Election Commission ka Ri India (ECI) ban lah pyniasoh ia ki EPIC bad u Aadhaar.
Haba iakren bad ki nongthoh khubor, i Kong Banrikynti i pyntip ba shitaiew mynta ila leit rung ha kawei ka longiing kaba don ha Thranghok Rngad Road Laban ban pyndep iala ka jong ka kamram.
Hynrei i iathuh ba kawei ka Longkmie kaba kam ba u kurim jong ka, u dei uba trei hapoh ka Ophis u Superintendent of Police, kala shondur ia i na la ka jong ka phone khlem da ioh jingbit.
La kynnoh ba tang hadien khyndiat por, u Kurim jong ka, u la pynsaphriang ia kane ka dur lyngba ka Whatsapp haba kynnoh ruh ba ka dei ka briew ba shukor. Kine ki shikurim kila pynsaphriang ia ka dur jong I ha kylleng ki jaka.
Kine ki arngut ki shikurim ki dei kiba la tip kyrteng da u Amir Nongbri bad ka kong R Rymmai
Ki BLO ki la shong jingialang kyrieh hynne ka sngi ha Assam Club, Laban bad kila ai ia ka jingkyrshan ba pura ia i Kong Banrikynti Ryntathiang iba la shah kynnoh myn shukor ha kine ki shikurim kiba sah ha Thranghok Road, Laban.
Namar ka jingbitar ia kane, kane ka BLO kala leit ban ujor da ka ejahar pyrshah ia kine ki shukurim hapoh ka Ophis u Superintendent of Police bad la ai copy ruh sha ka Deputy Commissioner ka East Khasi Hills lem bad sha u Chief Electoral Officer (CEO) ka Jylla.
