Shillong, Naitung 01: Ka All India Trinamool Congress (AITC) ba don ha ka Liang Pyrshah, hynne ka sngi thohdieng, kala ujor da ka ejahar pyrshah ia ki runar kiba pynsaphriang ia ka kyrwoh khubor thok ha ka kyrteng jong u National General Secretary ka Party u Abhishek Banerjee myn ha ka 29 tarik Jylliew.
Ha kane ka ejahar bala buh ha u Office Incharge ka Cybel Cell Police Station, u Vice President ka Meghalaya Pradesh Trinamool Congress (MPTCC) Bah James S Lyngdoh ula ong “La kyrpad ban leh da kaba tyngeh bad ban kem ia ki runar bad ruh ban wad ia ka mobile ba nyngkong eh kaba pynsaphriang ia kane ka kyrwoh khubor thok kiba la pynsaphriang ha kylleng ki social media, da kaba leh eiei mardor kat kum ki kyndon ba iahap jong ka Information and Technology Act, 2000”.
U Bah James u ong ba ka AITC ha ka Jylla Meghalaya, kala pynlong ia ka jingialang jong ki nongkitkam bad ka jingplie ia ka Ophis ka Party ha ka 29 tarik Jylliew ha kaba u Abhishek Benerjee ula wan ban iuhkjat ha kane ka Ophis.
Hynrei kyndit ba ha kane ka juh ka janmiet, ka kyrwoh khubor thok ha ka letter head jong ka AITC bad bala soi da u National General Secretary, la pynsaphriang da ki runar ba pynjah burom ia ka party da kaba ong ruh ba ka Party kala pynbna ia ka thup kyrteng ba-ar jong ki kyrtong ban iakhun ia ka elekshon MLA 2023 ha Jylla kiba kynthup ia u Vicky Dey bad ka Kong Patricia Mukhim, Editor ka kot khubor Shillong Times.
