Shillong, Jymmang 09: Ka jingialehkai kaba 104 jong ka group league ka lympung 5th Meghalaya State League, la pynlong mynta ka sngi, ha kaba ka kynhun ialehkai Balmanduri FC ka la jop da 1-0 ia ka Janepih YSCA, ka jingiakhun jong ka Group G ba la long ha Williamnagar .
Ia kane ka shi kol ka Balmanduri FC la thep ia ka da u Jurisbirth Marak ha ka minit kaba 24, hynrei kane kam don jingktah eiei ia ka Janepih, kaba la dep ban pyntikna lypa ialade ba kan bat ia ka kyrdan ba nyngkong na kane ka group, katba na ka liang ka Balmanduri kan iai neh ha ka kyrdan kaba saw.
Hynrei ki khmat pat baroh mynta kin phai sha ka kyrdan iakhun jong ka pre-quaterfinal, ban iakhun da ki 16 tylli ki team, ha kaba ki nongjop na kane kawei pat ka kyrdan iakhun kin bteng ban ioh iakhun pat ialade sha Round of 8, ba don artylli ki group ba don mar saw tylli ki kynhun.
Kumban shu pynpaw biang hangne ba ka MSL mynta ka kuynti ka kham long kaba heh bad ba jlan bha ka prokram ialehkai ka jong ka haba ia nujor bad ka MSL kiba la long ha ki snem ba la leit noh bad ba la pyniaid ia ka kat kum ki kyndon bam la pruid dak ia ka da ka All India Football Federation (AIFF)
Ka Round 16 yn sdang pynlong ia ka naduh ka lah sngi U Blei ban wan, ha ki 6 na ki 7 tylli ki jaka bad baroh ki jingiakhun kin sdang ha ka por 2 baje mynsngi, katba ha nongbah Shillong kan don artylli ki jingiakhun kawei kaban long ha ka por 1 baje mynsngi bad kawei pat kan long ha ka por 5:30 janmiet ha SSA Stadium, Polo.
