Shillong, Jymmang 02 : Ka champion ba menshemsnem Mawlai SC kala bat biang iala ka jaka ha ka pre-quarterfinal jong ka lympung 5th Meghalaya State League da ka jingpynliem ia ka Lamin XI SCC da 2-1 kol ha ka Group C ha madan Amlarem.
Ka jingkylli kaba mih ka long la ki rang ialehkai ba dang khynnah ka Mawlai kin lah ban iakhun ia ki jingtynjuh, khamtam hadien ka jingshah pynshah pynhap bad ka Laskein SCSC ha ka 28 tarik Iaiong.
Ka Mawlai SC kala phah ia bun na ki rang ialehkai ba la ialehkai slem sha ka lympung I-League 3, hynrei ki rang ialehkai ba dang khynnah kila pyni ia ka sap bad tyngshain ha ka jingiakhun ha ka sngi Saitjain.
U samla Syndongmiki Lyngdoh (9′) bad Livingson Lyngdoh (77′) kila thep ia ka kol na ka bynta ka Champion u snem 2024-25 katba u Genial Lamin jong ka Lamin XI ula ioh thep ia ka kol ha ka minit ba 63.
Ha Shillong, ka Nangkiew Irat SC kala pynthikna ba kan pynlut ia ka stage ba nyngkong ha ka kyrdan ba halor eh ha ka Group B hadien ka jingjop da 6-1 kol ia ka Mawphu SC.
U samla Jefferson Pakyntein ula iohthep hattrick (16′, 32′, 57′) bad kiwei ki kol lah thep da u samla Dibinroy Nongspung (4′), Ronaldkydon L Nonglait (44′) bad Nikelson Bina (83’P). U samla Banman Roy Nongsiej (54′) ula ioh thep ia ka kol jong ka Mawphu ha ka por ba ka kynhun kala dep shah thep haduh 4 kol.
Ha ka Group-E, ka Lumphyrnai Sohphoh FC kala ioh rung sha ka pre-quarterfinal hadien ka jingbeh na ka jingshah thep shi kol ban pynliem ia ka Lamyrsiang SCC da 3-1 ha Wahiajer.
U Samla Eborki Marsharing (14′) ula ioh thep nyngkong na ka bynta ka Lamyrsiang hynrei ka Lumphrynai Sohphoh kala kthong nadien ha ka kylla miet bad kala ioh ia ka kol lyngba u samla Phrangsngi Law (52′) bad Sonowel Kharsati (79′, 81′).
Watla ka dang sah sa arkylla ban ialehkai ha kane ka group, ka Shillong Lajong FC bad kaLumphyrnai Sohphoh kila pynthikna ba kin jam shakhmat hynrei ym pat lah pat ban tip kano ka kynhun ka ban kut ha ka kyrdan ba hakhlieh duh jong ka Group.
Ha ka Group-D, ka Ladthalaboh SC kala pynliem ia ka Jalaphet Moochut Pyrdung SC da 10-1 kol ha Khliehriat. Baroh artylli ki kynhun kim pat jop satia kat haduh kane ka sngi bad baroh ar kila don shabar ka jingiabeh ban ioh rung sha ka round of 16.
Ha ka Group-F, ka Mishon SSCC kala pynliem ia ka Umlakro SC da 3-0 kol ha Mairang bad ia kine ki kol la thep da u samla Damanbhalang Ryntathiang (35′, 67′) bad Mebanlambeit War (53′).
Ha kane ka sngi Saitjain, la sakhi ruh ia artylli ki jingiakhun ba khlem ka jingiathep kol bad kine ki dei ka Jenepih YSCA bad ka Maram FC kiba don ha ka Group C bad iakhun ha Williamnagar lem bad ka Mawlarshong SC bad Mawten SC kiba iakhun ha Mawkyrwat jong ka Group H.
Kin don tang artylli ki jingiakhun ha ka sngi Nyngkong, ki ban sdang ha ka por 3 baje janmiet. Ha ka Group E, ka Iatylling Lumsehkot CSC kan iakhun pyrshah ia ka Lumphyrnai Sohphoh FC ha Wahiajer bad ha ka Group G, ka Balmanduri FC kan iakhun pyrshah ia ka Attong Matgrik DC ha Williamnagar.
