Guwahati, Jymmang 03: Ka sngi kaba kongsan ka ap ia ki kyrtong jong baroh ki seng sain pyrthei kiba iakhun ia ka ilekshon MLA sha ka iingdorbar thawain ka Jylla Assam, namar ba ka jingniew Vote kan long ha ka 4 tarik Jymmang.
Ki kyrtong na kylleng ka Jylla ki dang ap khmih lynti ia ka Resol.
Ha kajuh ka por, ki bor synshar bad ka State Election Commission of Assam ki la pyndep ïa ki jingdonkam baroh na ka bynta ka jingniew Vote.
Ha Guwahati, la pynkhlain bha iaki bor pahara ha Maniram Dewan Trade Centre kaba dei kawei naki jaka niew Vote.
Ka jingniew Vote na ka bynta 5 tylli ki Assembly constituency kata ka Jalukbari, New Guwahati, Central Guwahati, Dispur, bad Dimoria—kan long ha Maniram Dewan Trade Centre.
Kine ki constituency kidei napdeng ki 126 tylli ki constituency kiba don ha Assam.
Ka jingsdang niew Vote kan sdang naduh ka por 8:00 baje mynstep ha ka 4 tarik Jymmang.
La pynjur ki bor pahara iaka Strong Room hapdeng ka jing peitngor baroh shi sngi da ki bor pahara ban pynthikna ia ka jinglong hok bad khuid jong ka jing niew Vote.
