Shillong, Nailur 1: Ka jylla Meghalaya kala sakhi ia ka jingkiew ba 3.7% ha kaba iadei bad ka jingjia aksiden ki kali ba iap briew katkum ka kaiphod ba la pyllait da ka Ministry of Road Transport and Highways ha ka sngi Nyngkong kaba dei jong u snem 2023.
Ha u snem 2023, ka jingjia aksiden kali ha India kila don haduh 1.73 lak ngut kiba la duh noh ia la ka jingim katba kiba mynsaw pat ki don haduh 4.63 lak ngut ki briew.Ka jingjia aksiden ha ki surok bunsien na kiba bun ki daw bad la donkam ban don ki lad ki lynti ban pynduna ia ka jingaksiden bad ka jingiap briew.
Ha ka thain Northeast, ka kaiphod kala kdew, ki Jylla shatei lammihngi ha ka jingkheiñ kyllum ïa ki jingjia aksiden ka la long beit ha kine ki san snem ba la dep, kata u snem 2019 haduh 2023. Napdeng ki Jylla thaiñ Shatei Lam Mihngi,ka Assam ka la ïohi ïa ka jingbun tam ki jingjia aksiden ha u snem 2019 haduh 2023.
Ka Tripura, kaba don 577 tylli ki jingjia aksiden, ka don ha ka kyrdan kaba- ar, bud sa ka Manipur, kaba don 398 tylli ki jingjia. Ki jingjia aksiden ki la nang kiew ha u snem 2023 ban ia u snem 2022 ha Assam, Arunachal Pradesh bad Tripura. “Ha baroh kiwei pat ki jylla jong ka thain shatei lammihngi, ka la don ka jinghiar ha ki jingjia aksiden ha u snem 2023 haba ianujor bad u snem 2022”, ong ka kaiphod.
Ha u snem 2022 ki don haduh 162 ngut ki briew kiba la iap na ka jingjia aksiden kali ha Meghalaya, kaba la kiew sha ka 168 ngut ha u snem 2023. Ki jingjia aksiden kali ki la hiar na ka 246 sha ka 223 ngut.
Ha baroh kawei ka ri, ki don haduh 4,80,583 tylli ki jingjia aksiden surok kiba la pyntip da ki Jylla bad ki Union Territory (UT) ha u snem 2023, kiba la shim ia 1,72,890 ngut ki mynsiem briew bad kiba la mynsaw ia 4,62,825 ngut ki briew.Ka jingjia aksiden ha surok ha u snem 2023 ka la kiew da 4.2% haba ianujor bad u snem ba la dep, u snem 2022.
Napdeng ki Jylla, ka Tamil Nadu kaba don 67,213 tylli ki jingjia aksiden (14 %) ka dei kaba bun tam ki jingjia aksiden ha surok ha u snem 2023, bud sa ka jylla Madhya Pradesh (55,327, kata 11.5%). Ka Uttar Pradesh (23,652, kata 13.7%) ka long kaba ha khlieh duh jong ki Jylla ha kaba ïadei bad ka jingdon jong ki briew kiba ïap namar ki jingjia aksiden ha surok, bud sa ka Tamil Nadu (18,347, kata da 10.6%).
