New Delhi, Rymphang 11 : U Myntri Rangbah ka Mizoram Lalduhoma ula iakynduh ia u Myntri kam pohiing ka Ri Amit Shah ha ka sngi Saitjain bad pynpaw ia ka jingpyrshah halor ka rai jong ka Sorkar Pdeng ban ker sainar shiah noh ia ka khappud India-Myanmar bad ban pynkut ia ka jingtreikam ka Free Movement Regime (FMR).
Kat kum ka jingong ki Heh Sorkar, u Myntri Rangbah ula pynsngew ia ki jingsngewkhia halor kane ka jingker sainar bad ia ka jingai jingiarap bad jaka sah ia ki phet wit na Myanmar shapoh ka Jylla jong u.
Lah ban kdew hangne ba ka Free Movement Regime (FMR) ka shah ia ki nongshongshnong ba sah ha baroh arliang khappud ba kin rung kin mih katba mon hapoh ka 16 Km jong kine ki ri khlem ka passport ne visa.
U Heh Ophisar na ka Sorkar Mizoram ula iathuh ba myn haka sngi Saitjain, u Myntri Rangbah ula pynthikna biang hakhmat u Amit Shah ia ka jingpyrshah jong ki paid Mizo kiba sah ha khappud ka Myanmar bad Mizoram ia ka rai jong ka Sorkar Jylla.
Ha ki snem bala leit noh, ka Sorkar Jylla bad bun ki sengbhalang ka Jylla kynthup ka Young Mizo Association kila pyrshah jur ia ka jingthmu ka Sorkar India ban ker sainar ha khappud Myanmar bad ban pynkut noh ia ka FMR bala iasoi hapdeng ki artylli ki Ri.
