Aizawl, Lber 21: Ha kawei na ki jingjia kaba la wanrah ia ka jingkhihwin, na ka liang u Lat ka Mizoram u Dr. Hari Babu Kambhampati u la pan jingmut na ka Election Commission of India (ECI) lyngba ka jingkyrpad ban kyntu pynkut noh ia ka jinglong myntri pyrshah ia u Robert Romawia Royte halor ki jingkynnoh kam ioh nong shimet lyngba ka kam kaba u bat hapoh ki tnat sorkar ne ‘office of profit.’
Ka party liang pyrshah ba hakhmat ka Mizoram, ka Zoram People’s Movement (ZPM) ka la phah da ka jingkyrpad da kaba kam ba u Royte u donkti ha ki kam shim kabu lyngba ka kam kaba u bat da kaba don la ka jong ka consultancy firm kaba khmih bad pyntrei ha kiba bun ki kam kontrak hapoh jong ka sorkar jylla kaba long ka jingpynkhein ia ka kyndon Representation of People (RP) Act.
Ha katei ka jingkyrpad ka ZPM ka la kynnoh ba u Royte, uba dei u trai jong ka North East Consultancy Services (NECS), u la pyniaid ia kane ka jaka treikam da kaba siew ruh ia ka khajna Goods and Services Tax (GST) wat hadien ba u la shah jied sha ka iingdorbar thawain ka jylla ha u snem 2018.
Katkum katei ka jingkyrpad jong ka ZPM la kam ruh ba u Royte u la buhrieh ha ka affidavit ka jong u ha kaba iadei bad ki projek kiba dang iaid shakhmat ia kiba la pyntrei da ka kynhun jong u wat ha ka por ba u la file ia ka nomination na ka bynta ban iakhun ha ka ilekshon assembly ha u 2018.
U Royte u la ioh ban bat ia shibun ki tnat treikam hapoh ka sorkar, kata kynthup ia ka tnat sports bad tourism kum u myntri sorkar ka jylla hapoh ka sorkar jong ka Mizo National Front (MNF) ba la lamkhmat da u Myntri Rangbah (CM) Zoramthanga.Dang shen u Royte u la ioh ban bat ia ka tnat District Council and Minority Affairs.
