Aizawl, Lber 25: Ki bor pulit ki la lapdien ia ki laitylli ki met iap ba la ingkhong jong ki laingut ki briew kiba jah rngai na Mizoram kaba kynthup ia kawei ka longkmie na ka jaka khlaw hapoh Myanmar, kata hajan ki bynta khappud, ong u heh pulit ha ka 24 tarik mynta u bnai.
Katkum ki tyllong khubor la ong ba kine ki laingut ki briew ki la mih na ka shnong Ainal kaba hapoh Siaha district ha ka 19 tarik mynta u bnai da ka jingthmu ban leit shapoh Myanmar.
Katkum ka jingpynpaw da u Inspector General of Police (Law & Order) ka Lalbiakthanga Khiangte la ong ba ia kine ki briew la bat koidi da kawei ka kynhun ia kaba la ngeit kaba dei napoh Myanmar bad kaba don ruh ia ka jingiadei bad ki kynhun ialeh pyrshah ha ki por kiba la dep hashwa ba kan pynkut noh ia kane ka jingiadei.
Katkum ka khubor pulit la ong ba kitei ki runar ki la pyniap noh ia kine ki laingut ki briew namar kim shym la pynphai pura ia ka pisa ka ban plielad ia ki bad kin ioh ban thied tiar ialeh.
Nalor kata u la ong ruh ba ia kine ki metiap ba la ingkhong la lapdien ha ka 23 tarik mynta u bnai na ka jaka khlaw hapoh Myanmar kata kumba ar kilomitar na ka jaka khappud jong ka ri.
Ki runar kiba la leh ia kane ka kam pyntriem la ngeit ba ki dei napoh Myanmar.Katkum u Khiangte la ong ba na ka liang ki bor pulit kila pynlong ka jingthwet kaba jur ban ioh kem ia ki briew kiba donkti.
Ka Myanmar bad ka Mizoram ki ia sam lang ia ka jaka khappud kaba 510 kilomitar.
