Aizawl, K’Lyngkot 29: Ka Zo-Reunification Organisation (ZORO) ka la pynlong ïa ki jingïakhih pyrshah ïa ka hukum jong ka Sorkar Jylla ban pynduh noh ïa ka rung ka mih ba laitluid ne Free Movement Regime (FMR) bad ban ker noh ia shi lynter ka khappud Indo-Myanmar.
Iaki jingiakhih la pynlong ha Aizawl bad ha kiwei kiwei ki nongbah jong ki District, kiba kynthup ia ka Champhai, Lunglei, Kolasib, bad Serchhip, kumjuh ruh ha Mimbung, Vaphai, bad ha ki bynta jong ka Manipur, kum ha Tengnoupal bad Chandel.
U Vice President ka ZORO u Rohmingthanga Kawlni u la pynrem jur ia ka rai jong ka Sorkar Pdeng ban weng noh ïa ka FMR, kaba la ailad ïa ki briew kiba sah hapoh 16 km na khappud ban leit khlem da donkam Visa.
U la pynrem ruh ia ka Sorkar Jylla kaba kyrshan ia katei ka kam.
U General Secretary L Ramdinliana Renthlei u la ban jur ba katei ka rai jong ka Sorkar Jylla ka la pynbitar ïa ki paidbah jong ka Mizoram bad ki jaitbynriew Zo kiba don sha shiliang khappud.
U la ong ba kane ka wanrah ïa ka jingpyrshah kaba jur na ka ZORO, ki seng treimon sngewbha, bad ki seng saiñpyrthei.
Ka ïing dorbar thaw aiñ jong ka Jylla Mizoram ka la mynjur daka Resolution ban kyntait ïa ka jingthmu jong ka Sorkar Pdeng.
U Renthlei la maham ba lada pyntreikam iaka Policy khlem ka jingmynjur paidbah, ka ZORO kan nym kitkhlieh ia kino kino ki jingjia nangne shakhmat.
U la pynskhem biang ïa ka jingkular jong ka seng ban pyrshah ïa ka jingpynduh ïa ka FMR bad ka jingker khappud, da kaba khot ïa ki nongshong shnong ban kyrshan ïa ka jingthmu jong ki.
Ka ZORO kham mynshwa ka la kyntu ia ka Sorkar Pdeng ban weng noh ia katei ka hukum bad pyntreikam biang ia ka FMR.
Ka seng ka la kynthoh ruh ia ka jingbujli ia ka FMR da ka Border Pass System kaba dawa ia ki nongshong shnong kiba don hapoh 10 km na u pud u sam ban pan ia ki jingbit ba kyrpang ban rung ban mih.
