Aizawl, Risaw 22 : U Myntri Rangbah Duh ka Ri Narendra Modi, u lah ban hiar ialap elekshon ia la ka party – ka Bharatiya Janata Party (BJP) ha ka 30 tarik Risaw sha Mizoram.
Kat kum ka khubor, u Modi u lah ban leit ialap elekshon ia ki kyrtong ka party ha Mamit District ka Mizoram.
Kiwei pat ki nongialam ka BJP kiban leit ialap elekshon ia ki kyrtong shuwa ka elekshon MLA ki kynthup ia u President ka party JP Nadda, u Myntri ka Sorkar Pdeng Rajnath Singh bad u Niti Gadkari.
Na kane kane ka elekshon, ka BJP kala pynieng haduh 23 ngut ki kyrtong na ka 40 tylli ki constituency.
Ka elekshon ha Mizoram kan long beit tang shi phase ha ka 7 tarik Naiwieng bad ka jingniew ia ki vote kan long ha ka 3 tarik u Nohprah.
Ha kane ka elekshon ban wan, ki don haduh 8,56,868 ngut ki ban iathep vote ba kynthup ia 4,38,925 ngut ki kynthei.
Ha kajuh ka por, ka jingthep kyrteng jong ki kyrtong ha kane ka elekshon kala kut ha ka sngi Thohdieng ha kaba haduh 174 ngut ki kyrtong kynthup ia 18 ngut ki kynthei kila thep kyrteng.
Lah ban kdew ba ha ka elekshon 2018, ka MNF kala jop haduh 26 seat bad ioh haduh 37.69% jong ka vote. Hadien, ka MNF kala jop biang ia artylli ki elekshon shiteng samoi kaba pynkiew ia ka jingdon MLA sha ka 28 ngut.
