Aizawl, Lber 03 : U Myntri kam pohiing ka sorkar pdeng u Amit Shah un wan ban plie ia ka complex (iing) kaba thymmai jong ka tnat shipai Assam Rifles ha Mizoram ha ka 17 tarik mynta u bnai, ong u Myntri Rangbah (CM) ka jylla u Zoramthanga lyngba ki lad pathai khubor.
Ka jingpynkynriah noh ia ka ktem jong ka Assam Rifles na ki bynta pdeng jong ka Aizawl sha Zokhawsang ha ka jingjngai kaba long kumba 15 na ka sorkar ka dei kawei napdeng ki mat ba hakhmat jong jong ka sorkar synshar Mizo National Front (MNF) ha ka ilekshon assembly kaba la long u bnai Naiwieng 2018.
Ha u bnai Rymphang 2019, ka tnat kam pohiing ka sorkar pdeng ka la hukum ia ka tnat shipai Assam Rifles ba kan pynkynriah noh ia ka headquarter jong ka battalion sha Zokhawsang kat haduh ka 31 tarik u bnai Jymmang jong utei u snem.
Kane ka tnat shipai kaba la rim tam hapoh ka ri ka don artylli ki ktem jong ka Assam Rifles ha Zodin bad Khatla ha ki bynta pdeng jong ka sorbah.
Ia kawei ka ktem kaba don ha Zodin la pynriah noh sha Zokhawsang.Ha ka por ba la pynlong ia ka jingialang bad u Amit Shah ha u bnai Naiwieng jong ka snem ba la dep, u Zoramthanga u la pntip sha une u myntri kam pohiing ba ka jingpynslem ban pynkynriah ia ka ktem jong ki shipai Assam Rifles ka dei namar ka jingpynslem ia ki jingtei ha ka nongbah ka jylla.
