Nongpoh, Nailur 05: Hadien ka jingpyrshah jong ki kynhun bapher bapher, u MLA ka Jirang Constituency Bah Sosthenes Sohtun, hynne ka sngi ula pynpaw lang ia ka jingpyrshah ia ka jingthmu jong ka Sorkar Jylla ban buh ia ka ktem khalai Casino ha ki shnong khappud jong ka Constituency ba u mihkhmat.
“Nga dap da ka jingsngewkhia ban ioh jingtip ba ka don ka jingthmu ban wanrah ia ka ktem khalai Casino hapoh ka Constituency ba nga mihkhmat” ong u Bah Sosthenes Sohtun haba iakren bad ki nongthoh khubor ha Nongpoh.
Une u MLA uba don ha ka Liang Synshar, ula iathuh “Hadien ka jingioh jingtip, nga la leit ban iakynduh ia ki Myntri Sorkar ban pynpaw ia ka jingpyrshah bad nga la kyrpad ruh ba kim dei ban hun ne treh ban wanrah ia kane ka ktam khalai namar ka lah ban wanrah ia shibun ki jingsniew”.
Halor ka jingkynnoh ba kawei ka Shnong kala dep ai No-Objection Certificate (NoC) ban buh ia kane ka ktem khalai, u Bah Sosthenes ula ong “Nga la dep ban iakynduh ia u Rangbah Shnong bad nga la kyntu ba u dei ban weng noh shwa ia kane ka NoC”.
