Guwahati, Jylliew 25: Kumba 3 hajar ngut ki briew kiba dei na ka jylla Assam bad Meghalaya kila pynlong ia ka jingiakhih paidbah ha Chaygaon, South Kamrup district, ha ka sngi Balang ban pynpaw ia ka jingpyrshah ia ka jingthmu ban tei ia ka dam kaba heh bha ha ka wah Kulsi (Wah Khri) ha Khiam kaba dei ka khappud Assam-Meghalaya.
Kane ka jingiakhih kala sdang na iew Chaygaon , ha kaba ki paidbah kila ia lum lang khrui ha shwa ban ia iaid paidbah kumba 1.5 kilometer ha surok bah National Highway 17 shaduh sha Chaygaon Circle Officer’s office. Kine ki paidbah kila pynmih ruh ia ka sur ba sawa jam ban pyrshah da ka pyrta ia kine ki kyntien “Go Back Assam Government, Go Back Meghalaya Government,” kum ka dak jong ka jingpyrshah paidbah.
Kane ka jingiakhih, kala sdang ban mih na ka jingiakynduh ba dang shen hapdeng ki ar ngut ki myntri rangbah kata u Dr. Himanta Biswa Sarma bad u Conrad K. Sangma kaba la long ha Koinadhara Guest House, ha kaba kila ia kren na ka bynta ka jingthmu ban don ka dam ba 55-megawatt hydroelectric power project ha ka Wah Kulsi (Wah Khri).
Ki don haduh 19 tylli ki seng kiba la ia shim bynta ha kane ka jingiakhih, kiba la dawa mardor ban pynsangeh noh ia kane ka project da kaba pynpaw ka jingsngewkhia ia ka jingshah ktah ka mei mariang bad kumjuh ruh ia ka ioh ka kot jong ki paidbah.
Ki nongialam ba paw khmat ki kynthup ia u Laskar Rabha, u President ka Chhaygaon Regional Rabha Students’ Union, u Pradeep Rabha, u Central Vice-President ka ARSU, u Ashok Nongbak, u General Secretary jong ka Kamrup District, ka Bichitra Rabha, Vice-President ka All Rabha Women’s Council bad ka Sunita Marak, ka dkhot jong ka Garo National Council. Baroh kine kila pynpaw ka jingbym sngewtynnad ia baroh ar tylli ki sorkar kia khlem kynjoh ktien lang ia ki paidbah nong shong shnong.
Kine ki nongiakhih kila aiti ruh ia ka dorkhas sha u Myntri Rangbah ka Assam lyngba u Chaygaon Circle Officer, kiba la dawa ban sangeh noh mardor ia kane ka dam project.
Katkum ka jingong jong ki nongmihkhmat jong ka seng samla pule, ka jingthmu ban tei ïa ka dam kaba jrong 62 meter kan ktah jur ïa kane ka thaiñ, kaba lah ban pynrkhiang ïa ka bynta kaba 35 kilomitar jong ka wah Kulsi, ban pynjulor ïa ki jaka rep, ban buh jingma ïa ki dohkha wah kiba la jan duh jait, bad ban pynjot ïa ki jingthaw ba im ha ka thaiñ.
Kine ki paidbah kiba la pynlng ia ka jingiakhih kila maham tyngeh, da kaba ong lada ka sorkar kan pyniaid sha khmat ia kane ka project kin sa dang pynkhlain shuh shuh ia ka jingiakhih ha kine ki sngi ban wan.
 ha Khiam kaba dei ka khappud Assam-Meghalaya.){kind=link}