Nongstoiñ, Jylliew 25: Ka ophis jong ka District Medical & Health Officer (DMHO), West Khasi Hills District, lyngba ka District Task Force ka la pynlong ïa ka jingïalang ban bishar bniah halor ka jingai Tika, ka jingpang ‘ñiangpyrsit bad ka jingpyntreikam ïa ka STOP Diarrhea Campaign 2025 hapoh ka Distrik.
La pynlong ïa kane ka jingïalang hapoh Conference Hall ka ophis DMHO ba la pynïaid da u Bah S. Marweiñ, Additional Deputy Commissioner (ADC), ha ryngkat ka jingdonlang I Dr. M. Sohliya (DMHO), Dr. Z. Marak (Additional DMHO), kiwei pat doktor, ki nongtrei ka NHM, ki nongmihkhmat na ka ophis u District School Education Officer (DSEO), Social Welfare Department bad District Public Relations Officer (DPRO).
Ki nongkren ki la pynpaw ba watla ka Distrik ka la kiew ha ka jingai tika haba ïa nujor na kawei ka snem kiwei pat. Pynban dang donkam ban pynbha shuh shuh, khamtam eh ha ki jaka ki kham eh, ha kaba ïadei bad ki lynti ki syngkieng.
Kaba kongsan ka dei ka jingbym treh ki kmie ki kpa ban ai tika na ka daw ka jingngeit biej ne ngeit khlem nongrim, nalor kiwei kiwei pat ki daw ba kim pat shaniah ïa ka tika. Kane ka wanrah shibun ki jingduhnong khamtam eh ïa ka koit ka khiah ki khunlung.
Ban ïaleh pyrshah ïa kine ki jingeh, la ai jingmut ban pynkhlaiñ shuh shuh ïa ki lad ban pynsngewthuh paidbah, lyngba ka jingïatreilang ki tnad sorkar bapher bapher, ka jingïashim bynta jong ki nongïalam shnong bad ki riew paidbah. Ka jingpyndonkam ïa ki skhim ka sorkar ban kyntiew shuh shuh ïa ka jingai tika hapoh ka Distrik.
Kawei na ki bynta ba kongsan jong kane ka jingïalang, ka long ka jingbishar ïa ka jingpyntreikam ia ka STOP Diarrhea Campaign 2025, kaba la sdang naduh ka 2 tarik u Jylliew bad kan neh haduh ka 31 tarik u Naitung 2025.
Kane ka campaign ka thew kyrpang eh na ka bynta ki khynnah hapoh ka 5 snem ka rta, ha kaba ka thong ka long ban pynduna na ka jingshah ktah bad ka jingkhlad ki khunlung na ka jingpang pynhiar, kaba khie khah khah bad jur bha ha ka aiom lyiur.
Kane ka campaign ka kynthup ka jingai ORS bad zinc, ka jinghikai leh khuid kum ka jingsait kti, ka jingmyntoi jong ka dud na ka kmie bad ka jingsumar khuid ïa ka um bam um dih.
Shuh shuh, ka thong jong ka District Administration bad ka tnad ka koit ka khiah, ka long ban pynïoh lut ïa ka tika sha baroh ki khunlung, ban ïada ïa ki na ki jingpang kiba pher bapher khnang ba kin ïoh ïa ka met kaba koit kaba khïah.
La pynsngew ruh halor ka jingdonkam ïa ka jingïatreilang jong baroh naduh ki bor shnong, ki tnad sorkar, ki kmie ki kpa bad ba uwei u khunlung ruh un ym shah iehnoh satia ha kaba ïadei bad ka jingai tika. kumjuh ruh kiwei kiwei pat ki jingmyntoi kiba ka tnad ka koit ka khiah ka kwah ban wanrah.
, West Khasi Hills District, lyngba ka District Task Force ka la pynlong ïa ka jingïalang ban bishar bniah halor ka jingai Tika, ka jingpang ‘ñiangpyrsit bad ka jingpyntreikam ïa ka STOP Diarrhea Campaign 2025 hapoh ka Distrik.){kind=link}