Shillong, Naiwieng 14 :U Secretary ka Meghalaya Pradesh Congress Committee (MPCC) ba khmih ia ka Nongpoh Bah Corest Marwein, hynne ka sngi nyngkong ula mih noh na ka Congress da kaba ai daw ba ki paidbah kim sngewtynnad satia bad u kyrtong ka party na Nongpoh Constituency.
Haba iakren bad ki nongthoh khubor hadien ba aiti ia ka shithi iehnohkam, u Bah Corest ula ong ba ula ai jingmut ia ka Party ba kan pynkhlain bha ha Nongpoh Constituency.
“Hynrei katba nang iaid ka por, ngi iohi pynban ba ka party kala nang tlot namar kam don satia ka jingiatylli bad ka party ruh kam shym la lah ban lum ban lang bha ha Nongpoh naba kila kyntait ia ki nongtrei jong ka party” ula ong.
“Ki paidbah na kumba 128 tylli ki Shnong ba nga la leit iuhkjat, kim kwah shuh ban don bad ka Congress namar kim sngew tynnad ia ka rukom jied ia u/ka kyrtong sha ka elekshon MLA 2023. U kyrtong u dei na ka UDP bad ki paidbah kim pdiang satia ia u. Namar kata, ngam kwah shuh ban trei bad ka Congress namar ki paidbah kim kwah shuh ban don bad ka Congress” ula bynrap.
Ha kajuh ka por, u President ka MPCC ma Vincent H Pala ula ong ba ka Congress kan sa pyrshang ban iakren biang bad u Bah Corest.
“U (Corest)la phah ia nga ha ka por ba nga don ha Europe ban iashimbynta ha ka jingialang ka Parliamentary Committee. Nga la ong ha u ba ngin sa iakynduh hynrei ula kloi buh ia ka shithi iehnohkam hynrei kane kam pher ngin sa kren ia u” ong u ma Pala.
Une u Nongialam ka Congress ula ong kane ka pyni ruh ba lehse u Bah Corest u kwah ia ka ticket jong ka party.
