Shillong, Jymmang 31: U General Secretary ka United Democratic Party (UDP) bad MLA barim ka Nongthymmai constituency Bah Jemino Mawthoh u la rai ban mih noh naka United Democratic Party (UDP).
Ïa kane la pynthikna da u nongïalam ka UDP bad MDC ka Sohra Bah Titosstarwell Chyne haba ïathuh ba u Bah Jemino u la dep ban aiti ïa ka shithi iehnoh kam sha u President ka Party Bah Metbah Lyngdoh.
“Ngi la ioh jingtip ba u President ka UDP u la ioh pdiang ia ka shithi” u la bynrap.
Haba kylli, u Bah Titos u la ong ba um pat iohi ia ka shithi kumta kam long kaba lah ia u ban tip kaei kaba la pynlong ia u Jemino ban shim kynsan ia ka rai ban mih noh na ka UDP.
Katkum ka jingong jong u, baroh ki kam ki iaid beit iaid ryntih hapoh ka Party.
Kat kum ka shithi iehnohkam bala iohpdiang da ka Shlem, u Dr Jemino ula aiti ia kane ka shithi iehnohkam naduh ka 20 tarik Jymmang da kaba pynpaw ba ka dei na ka daw shimet bad ki kam ki bym lah ban kiar.
“…namar ki daw ki bym lah ban kiar, nga buh ia kane ka shithi iehnohkam kum u dkhot jong ka party bad pyllait noh ruh ia ki kam ba nga bat mynta kum u General Secretary naduh mynta” ula ong ha ka shithi.
“Nga sngew donbok palat ban shakri ia ka Party kum u Nongthaw Ain, u Working President naduh u snem 2014 bad kum u General Secretary naduh u 2016 haduh mynta. Nga kwah ban pynpaw ia ka jingsngewnguh naduh ka mynsiem ia ki lad ba ka party kala ai ha nga ha baroh kine ki snem ban shakri ia ki paidbah jong ka constituency jong nga bad jong ka Jylla. Nga sngewnguh ia ki jingkyrshan jong ki para ba iatreilang bad nga ha baroh kine ki snem ba nga don ha ki kyrdan bapher bapher hapoh ka party” ula bynrap.
