Shillong, Nohprah 13 : Ka Congress kaba don ha Liang Pyrshah ha Jylla, ha ka sngi Thohdieng, kala mih noh na ka Executve Committee (EC) jong ka Khasi Hills Democratic Front (KHDF) ba ialam da ka National People’s Party (NPP) ha Khasi Hills Autonomous District Council (KHADC).
Kane ka jingiakhlad lok jong ka Congress bad ka NPP kala wan jia tang da ki bnai shuwa ban leit sha ka elekshon jied thymmai ia ki dkhot (MDC) sha ka Iingdorbar Thaw Ain jong ka KHADC.
U Nongialam ka Congress ha KHADC Bah PN Syiem ula ai ia ka shithi iehnoh kam kum u Deputy Chief Executive Member (DyCEM) bad u Bah Ronnie V Lyngdoh kum u Chairman ka Advisory Committee ka Council.
Ia ki shithi iehnohkam bad ban weng jingkyrmen la aiti sha u CEM bad Chairman ka KHDF Bah Pyniaid Sing Syiem.
Haba kren sha ki nongthoh khubor, u Bah PN Syiem ula ong “Ngim don lad shuh da kumwei lait na ka jingmih noh na ka EC ba ialam da ka KHDF. Naba ki Nongialam ka party bad ki nongtrei ka party kim sngew iahap ban iatreilang bad ka NPP ha KHADC, ngi la rai ban burom ia ka jingsngew bad jingai jingmut jong ki”.
Ula pynkynmaw ba ki nongialam ka party bad ki nongtrei ki la pynbor ia ki Nongialam ka Congress ha KHADC ba kin weng noh mardor ia ka jingkyrshan ia ka EC ka NPP naduh ka 20 tarik Nailur mynta u snem. Kumjuh ruh ki President jong ki District Congress Committee (DCC) kila thoh shithi dang shen sha ka AICC bap hah ban tuklar halor ka jingslem jong ki MDC ban mih noh na ka EC ba ialam da ka NPP ha KHADC.
Ha kawei ka liang, une u Nongialam ka Congress kala ong ba ka rai jongka party ban weng noh ia ka jingkyrshan kan ym don jingktah satia ia ka party sha ka elekshon ban wan ka KHADC.
“Kan ym ktah sayia ia ngi ha ka elekshon ban wan namar kan shong eh ha ka jingtreikam jongki Nongialam. Lada ki MDC ka Congres ki lah ban leh shibun kiei kiei ha ka por kaba lyngkot, ki paidbah kin kham khmih kham bun na ngi bad ngin sa leh ia kaba donkam” ula ong.
Ka jingmih jong ka Congress na ka KHDF kan ym don don jingktah satia ia ka Executive Committee ba ialam da ka NPP- kaba dang skhem triang ban bat ia u lakam ka jingsynshar haduh ba kut ka samoi treikam ha ki sdang bnai jong u snem ban wan.
Haba jubab ia ka jingkylli, u Bah PN Syiem ula ong ba ka Congress kan shong noh mynta ha ka Liang Pyrshah bad bynrap “Ka rai jong ngi kan ym ktah satia ia ka EC namar ki dang don bun paid. Ki dang don 16-17 ngut ki DKhot ha ka KHDF”.
Da ka jingmihnoh ka Congress kaba don 3 ngut ki MDC, ka KHDF mynta kan don sa 16 ngut ki MDC ba kynthup ia ka NPP-15 ngut bad uwei u MDC shimet.
Lah ban kdew hangne ba ka KHADC ka don mynta satang 27 ngut ki MDC ba jied u paidbah bad uwei u MDC ba shusieh. Arngut ki MDC kila khlad ha une u snem ba kynthup ia u MDC ka UDP na Shella Bah Teinwell Dkhar bad u MDC shimet na Nongthymmai Bah Latiplang Kharkongor.
Ki dkhot ka Liang Pyrshah ha KHADC ki kynthup ia ka UDP-7 ngut ki MDC, ka Congress-3 ngut bad ka HSPDP-1 bad u MDC ba shusieh
 jong ka Khasi Hills Democratic Front (KHDF) ba ialam da ka National People’s Party (NPP) ha Khasi Hills Autonomous District Council (KHADC).Kane ka jingiakhlad lok jong ka Congress bad ka NPP kala wan jia tang da ki bnai shuwa ban leit sha ka elekshon jied thymmai ia ki dkhot (MDC) sha ka Iingdorbar Thaw Ain jong ka KHADC.){kind=link}