Shillong, Iaiong 19: Ki paidbah ka Jylla mynta ka sngi kila ioh ban sakhi da la ki jong ki khmat ia ki buit bad ki sap niah kali da ki briew kiba la shemphang bha bad kane kala pynshoh biej ia ka jingtriem jong ki naduh ki nongniah kali ar shaka haduh ki saw shaka.
Ia kane ki paidbah kila ioh ban sakhi ha ka ‘Indian Racing Festival – carnival of Total Control’ kaba la pynlong da ka JK Tyre ha ka jingiatreilang bad ka Meghalaya Motorsport Society bad ka Assam Rifles (Laitkor).
Kane ka lympung kala khring shisha ia ki paidbah bad khamtam eh ia ki samla kynthei bad shynrang kiba sngewtynnad ha ka kam niah kali, ia kaba la pynlong ha Laitkor DARG.
Ha kane ka sngi u Lieutenant General Vikas Lakhera, Director General Assam Rifles, u la long kum u Kongsan ha ryngkat bad ka ka Rosetta Mary Kurbah ka Deputy Commissioner ka East Khasi Hills, kum ka symbud kongsan.
Ki paidbah ki la sakhi ïa ki drifting ia ki kali Lexus bad BMW kada pyniap biej shisha ia ki paidbah kiba la wan ban sakhi bad kumjuh ruh ka jingleh stunt na ki lai tylli ki Superbike, bad ki jingpyni nam da ar ngut ki heprit ba dang hapoh 12 snem ia ka kali Rotax Kart jong ki bad kumjuh ruh ia ka jingniah ia ki kali formula da ar ngut ki samla bad u wei napdeng jong ki u dei u Jaden Pariat na ka jylla Meghalaya.
U Lt. Gen Vikas Lakhera, DG ka Assam Rifles u la pynpaw ïa ka jingkmen da kaba ong, “Kane ka sngi ka long kaba sngewtynnad ban ïatreilang bad baroh ki paralok ha kane ka jingïalehkai ba kyrpang jong ka JK Tyre Indian Racing Festival.
Haba kren shaphang kane ka tamasa u Hari Singh uba dei u heh jong ka JK Tyre Motorsport u la ong, Ka jingwanrah ïa kane ka tamasa jong ka Indian Racing Festival sha Meghalaya ka la long kaba kyrpang shisha na ka bynta jong ka JK Tyre.
