Nongstoin, Naiwieng 04: Ki nongshongshnong ka Noapara, West Khasi Hills, kila iamih paidbah hynnin ka sngi palei ban ieng pyrshah ia ka jingwan shna surok MGNREGA ba beain ka sorkar Assam na Noapara sha Kshaid Balwa Wari.
Ki Nong Noapara kila leit buh ruh da ka nongujor sha ki Pulit ka Langpih Outpost ba pyntip ia ka jingwan shna jubor ia ka surok job card da ka sorkar Assam na Noapara sha Kshaid Balwa Wari kaba la pyrshah jur da u paidbah naduh u snem 2021.
La pyntip ba hynnin ka sngi, ka sorkar Assam ha ryngkat ka jingiarap ki Pulit Assam bad ki nongkyrshan kila sdang ia kane ka jingtei.
Ki Heh Pulit ki iathuh ba u Incharge ka Langpih AD camp ha ryngkat ki Ophisar na Aradonga Out Post kila hiar sha kane ka jaka ban pynlong ia ka jingtohkit.
Ha ka jingleit tohkit la lap ba ki Pulit ka Assam ba ialam da u Incharge Assam PPP lem bad u Circle Officer ka Boko PS, kila synran ia kawei ka JCB kaba dang lur ia ka surok ha Noapara ia kaba la pynsangeh noh hadien namar ka jingwan pyrshah ki paidbah kiba don hapdeng 50-80 ngut eiei.
Ki Heh Pulit ki pyntip ba ki paidbah kim shym treh ban iatreilang ne wat ban sngap ia ki jingkyrpad jong ki Pulit kiba dei na Assam bad Meghalaya ruh kumjuh.
Ki Heh Pulit ki iathuh ba ha ka jingtohkit bniah la lap ba don uwei u briew ba kyrteng u Dambar Bhatrai ba na Noapara u dei uba wanrah ia kane ka MGNREGA skhim khlem da iasyllok ia ki nongshong shnong bad kumjuh ruh ia u Rangbah Shnong ban shna ia kane ka surok ka ban pyniasoh shaduh sha shnong Kyrshai. Ki ong ba dei kane kaba la pynmih ia ka huri hura baroh.
La iathuh ba u Rangbah Shnong ka Noapara um don jingtip eiei ia kane lait noh tang u Secretary ka Noapara uba don jingtip.
Namar kane ka jingjia, u Circle Officer ka Boko lem bad u BDO ka Mawshynrut kila pynlong ia ka jingialang ha kaba la rai ba ki paidbah kin iapynlong jingialang para ma ki khnang ba kin iashim rai la kane ka surok kan bteng ne pynsangeh noh bad ban rah ruh ia kane ka kam sha ki Deputy Commissioner jong baroh artylli ki Jylla.
Halor ka rai ba ka dorbar Shnong Noapara kan lum ia ka jingialang paidbah ryngkat ka jingiatreilang jong ki paidbah na Meghalaya bad Assam ha ka jingiadonlang ki heh ophisar na ka district bad ki pulit, kila suk bad long jai jai noh.
