Nongstoin, Naitung 15: Ki paidbah jong ki lai tylli ki shnong ka Nongtrai Sepngi, kaba hap hapoh ka thain Langdongdai, West Khasi Hills, ha ka sngi ba-ar, ki la ia mih paidbah ban maramot hi ia ka surok kaba la jot, kaba la pyndik palat ia ka leit ka wan ki paidbah nongshong shnong ka thain.
Ryngkat ki tiar kum ki mohkhiew, ki lyngka bad ki kali ban kit maw, ki paid nongshong shnong naduh Mawsmai haduh Malangkona, ki la ia mih ryntih naduh ka por 9 baje ban maramot ia ka surok kaba 15 kilometer.
Ki riew rangbah naduh ki sordar shnong, secretary shnong bad ki riew paidbah kila iamih ryntih ban shna hi ia kane ka surok haduh ban pyndep kata haduh ka por 4 baje nohphai sngi.
Na ka liang u Assistant Secretary ka shnong Nonghawei, u la ong ba kane ka surok ka long kaba donkam bha ia ka thain namar ka dei u budlum ika khaii pateng bad ka leit ka wan ki 21 tylli ki shnong.
Ki paidbah shnong naduh Mawsmai, Mawkhar, Nonghawei bad kiwei kiwei ki shnong, ki dei kiba im ha ka rep ka riang. Kumta donkam ban pynbha ia ki surok kali khnang ba kan pynsuk ia ki nongrep ha ka khaii pateng bad ka surok ba bha kan kyntiew ruh ym tang ia ki nongrep, hynrei ka long kaba donkam kyrpang ia kiba pang ba shitom.
Na ka liang ki riew rangbah ki la pynpaw ka jingdiaw mynsiem namar ka jingbym shimkhia jong ka sorkar MDA ba la ialam da ka NPP. Kumta ki sngew ban kyntu sha ki bor sorkar, ka tnad PWD bad khamtam ia u MLA, ba un phai khmat bad sngewlem halor ka jingeh ki paidbah ha kaba ia dei bad ka leit ka wan, da kaba pynioh noh ia ki surok rong kiba bha kumba ioh lem kiwei pat ki para nongshong shnong hapoh ka Jylla.
