Boko, Nailur 05: Ki nongshong shnong naki shnong ba kynthup Kompaduli, Lepgaon, Bamunpara, Kothalpara, Gohalkona, Kacharipara, Jongakhuli ki la pynlong ia ka jingiakhih paidbah pyrshah ia ka jingtih mawsyiap na ka wah Boko ka ba don haka shnong Kompaduli.
Ia kane ka jingialang paidbah ban pyrshah iaka jingtih syiap la pynlong daki sengbhalang, seng kynthei bad ki ning shong shnong ka thain khappud ka shnong Gohalkona haka jingdon lang ki Nongmihkhmat na Garo Students Union Assam Zone bad ka Satra Mukti Sangram Samittee (SMSS).
Haba kren ha kane ka jingialang paidbah, u Nongialam ka Border Area Youths Development Organization u Johnson A Sangma u la ong ba na ka daw ka jingtih syiap ka um jong ka wah Boko ka nang hiar.
U Johnson u la ban jur ba katei ka jaka ka ktah ia ki jaka rep, ka umbam um dih bad ruh ka pynjakhlia ia ka wah kaba la sdang pynduhjait iaki jingdon jingem haki um.
U la kynnoh ruh ba ki briew ba tih syiap na kane ka Wah kila tih khlem da bud ryntih ia ki kyndon ba la bthah da ka Sorkar bad haduh mynta 2 ngut ki briew ki la duh ei ia la ka jong ka jingim.
“Ka jingkit palat pud ki kali kit syiap ka pynsiew ruh ia ka surok Boko ban leit sha Kompaduli kaba dang shu shna thymmai” u la ong.
Nalor kane u Johnson u la kynnoh ruh baka jingtih syiap ka long kum ka jingpang Cancer na ka bynta kane ka jaka kaba buh jingma ia ki marpoh khyndew, ki briew bad ka mariang jong ka thain.
Naka liang u President ka GSU Assam State Zone u Foldin R Marak u la kyntu ia u Myntri Rangbah ka Jylla u Himanta Biswa Sharma bad ia ka Sorkar Jylla ba kin sangeh bad khang noh mardor ia ka jingtih syiap.
U la Foldin u la ïathuh ruh ba ka GSU Assam State Zone bad ki paidbah ka thaiñ bad ka GSU ruh kan sa aiti ïa ka memorandum sha u Himanta Biswa Sarma ban khang noh ïa ka jingtih syiap.
Naka liang u Range Officer ka Singra Forest u Bhagabh Hazarika u la ong ba katkum ka jingtip tynrai, ki don ki briew kiba nabar kiba pynshit ia ki paidbah nongshong shnong pyrshah ia ka mahal ba la mynjur da ka Sorkar ban kyntiew iaka jingioh lum khajna.
“Ka Sorkar lyngba ka tnat khlaw ka la pyrshang ban shim ia ki lad ki lynti bapher bapher, kum ka jingiakren bad la phah Notice ban wan shaka jingialang hynrei kim shym la jubab. Shuh shuh don ki briew kiba nabar kiba pynkhih ia ka ki nongshong shnong” u la ong.
Ka tnat khlaw ka la ai ïa ka jaka ban pyntreikam da ki GPS Coordinate ban tih maw shyiap sha ka Assam Mineral Development Corporation Ltd na ka bynta hynriew snem naduh 2023.
U nongialam ka SMSS u Rahul Choudhury u la ong ba tad haduh ba ka Sorkar jylla kan khang ia katei ka mahal, ka SMSS kan iai bteng ia ka jingiakhih bad ki paidbah ka thain bad u la kyntu ia ki briew ba lada donkam kin iakhih pyrshah ia ka jingtih dewbilat ha khmat ka ophis Divisional Forest Office bad ha Assam Secretary lane hakhmat ka iingsah u Myntri Rangbah ka Jylla.
“Lada ka Sorkar kan nym shim khia, te ngin buh jingkylli halor kane ha ka iingdorbar lyngba u MLA ka Sibsagar u Akhil Gogoi” u la ong.
.){kind=link}