Agartala, K’lyngkot 30 : Ka sorkar synshar BJP ha Tripura ka la sakhi ia ka jingiehnoh kam, ka jingryngkoh seng bad ki jingiakhih namar ka jingbym hun ha kaba iadei bad ka jingpynbna ia ki kyrtong jong ka party na ka bynta kane ka ilekshon assembly ha Tripura.Nalor kata ki khubor ki iathuh ba kala don ruh ka jingpynjot pynpra ia ki ophis jong ka party bad ka jingpynjulor ia ki tiar ki tar ialap ilekshon ha ki district bapher bapher.
Kiba kum kine ki jingjia ki la jia ruh pyrshah ia ka liang pyrshah Congress, ha kaba ki nongtrei jong ka party ki la pynpaw ka jingbym sngewhun ha kaba iadei bad ka rukom ai tiket.
Kumba arngut ki nongialam ka BJP kiba kynthup ia u Shyamal Bhakta Chowdhury na Kamalasagar constituency kaba hapoh Sepahijala district bad u Niharendu Debnath na Jubarajnagar ha ka thain shatei ka Tripura ki la iehnoh kam na ka party bad ki lah ruh ban ia aireng ha kane ka ilekshon kum ki kyrtong shimet.
Da kaba kynnoh pyrshah ia u heh nongialam ka party ka jylla u Rajib Bhattacharjee, u Chowdhury u la ong ba ula shah pynthikna ban ioh tiket na ka bynta kane ka ilekshon assembly ka ban long ha ka 16 tarik u Rymphang u ban wan.
Ka BJP ka la pynieng na West Tripura District Zilla da ka Sabhadhipati Antara Deb Sarkar, kata napoh Kamalasagar constituency kaba la pynmih ka jingpyrshah kaba jur hapdeng ki nongialam bad ki nongtrei jong ka party ha kane ka thain.
Ha ka thain shatei ka Tripura, kata hapoh Kanchanpur, ki nongialam ka BJP bad ki nongtrei jong ka party ki la pynpaw ka jingpyrshah kaba jur halor ka jingai tiket napoh Kanchanpur seat sha ka paralok synrop ka BJP, ka Indigenous People’s Front of Tripura (IPFT), bad na ka liang ka jong ki, ki la jied ia u Bimanjoy Reang kum u kyrtong jong ka party.
U MLA ba mynta ka IPFT na Kanchanpur uba dei ruh u Myntri sorkar u Prem Kumar Reang um shym la leh ei ei na ka bynta ha kane ka thain bad um shym la leit jurip ruh ia kiba bun ki jaka jong ka constituency ha kine ki san snem kiba la leit noh, ong ki nongialam ka BJP ka thain lyngba ki lad pathai khubor hadien ka jingialang kaba heh.
Ki jingiakhih pyrshah, ka jingkhang tala ia ki ophis treikam bad ka jingpynjulor ia ki tiar ki tar ialap ilekshon kum ki lama jong ka party la iathuh ba ki la jia ha ki bynta jong ka Bagbassa, Kurti, Kadamtala, Jubarajnagar, Chandipur ha ka thain shatei kaTripura, bad ha Jolaibari bad Belonia ha ka thain shathie ka Tripura.
U nongialam ka BJP u la ong ba wat hadien ba ki la tip halor ka jinglong pyrshah ia kiba bun ki myntri sorkar, hynrei ka party ka la jied biang haduh kumba 15 ngut ki kyrtong kaba lah ban iarap ia ki liang pyrshah ba kin ioh ia ka jingkyrshan pyrshah ia ki kyrtong jong ka party synshar.
Ka liang pyrshah Congress ruh ka la mad ia ka jingiakhih da kito ki kynhun kiba pynpaw ka jingbym hun halor ka rukom jied kyrteng ha ki bynta jong ka Boxanagar, Kamalpur bad Dharmanagar constituency.
Ki katto katne ki nongtrei jong ka seng ki la maham ruh ba kin mih noh na ka party lymda la pynkylla pat ha kaba iadei bad ka jingai tiket.
