Shillong, Lber 26 : U Kyrtong ka Voice of the People Party (VPP) Dr Ricky AJ Syngkon ha ka sngi Ba-ar, ula kyntait war ba ka party jong u (VPP) ka pyrshah ia ka ktien Hindi.
“Ngim pat ju pyrshah ban kren ia ka ktien Hindi. Ka jingkynnoh kam dei kaei kaei hynrei ka buit politics jong kiwei pat ki seng sain pyrthei bad ngi pynrem jur ia kum kine ki jingkynthoh” ong u Bah Syngkon hadien ba dep thep kyrteng na Shillong Parliamentary constituency.
Haba pynpaw ba ka VPP ka ieng naka bynta ki bar jylla kiba dei ki trai shnong ka Jylla Meghalaya, une u General Secretary ka VPP ula ong ba u sngewskhem ba ki nongshongshnong ka Jylla kin aai ruh ka jingkyrshan ia ka party ha ka elekshon Lok Sabha.
“Ngi sngewnguh ia ka synniang jong ki bar jylla kiba la noh bha sha ka Jylla bad ki ruh ki donkam ban ioh ia ka jingiada bad ka party ruh kan pynthikna ba ka bha ka miat jong ki ruh kan ioh jingiada hynrei ha kajuh ka por ngi hap ruh ban iada ia ka Jylla na kito kiba beain. Kum ka party ngi sngewkhia halor ka hok tynrai bala pynkupbor da ka riti synshar wat ia kiwei ki briew ki bym dei ki Khasi” ula ong.
Haba pynpaw ia ka jingsngew skhem ban jop ia ka elekshon, u Bah Ricky ula ong ba ka party kala pynkhreh bha ban mih iakhun ia ka elekshon. Kat kum ka jingong jong u, ka party kala dep iaid ha baroh 36 tylli ki constituency ka Ri-lum Khasi bad Jaintia.
“Ma nga bad ka party, ngi sngewskhem bha ban jop ia ka elekshon…namar kat shaba ngi leit, ka jingkyrshan kaba ngi ioh na u paidbah ka long kaba jur bha bad ngi don ka jingngeit bad jingshaniah ha ki paidbah jong ki 36 tylli ki constituency” ula ong.
U Bah Ricky ula kyntait ruh ba ka VPP kala pynlong atiar ia ka kam ‘Ieid Jaidbynriew. “Ngim ju ong ia kata, ha ka jingshisha ngi la leit sha ki paidbah ban kren halor kumno ban wanrah ia ka synshar khadar kaba bha hapoh ka Jylla bad ban pynthikna ruh ban don ia ka jingbishar ba hok, ban weng ia ka jingduk nalor ka jingiada ia ka hok ki paidbah ka Jylla” ula ong.
U Bah Ricky ula ong ba ka rai jong ka BJP ban kyrshan ia ka NPP ka pyni ia ka jinglong ba shisha jong baroh artylli ki party hynrei ka party ka ieh ha ka jingstad ki paidbah ban shim ia ka rai halor kane ka kam.
