Shillong, Iaiong 22: Ka tnat Shillong Traffic Police (STP) hynne ka sngi haka jingiatreilang bad ka District Medical and Health Officer (DMHO) ka la pynlong ia ka jingai jingsumar eie lane ka Free Medical Camp.
Ïa kane ka Free Medical Camp la pynlong kyrpang ha Khyndai Lad naka bynta ki nongniah kali kamai bad ia ki pulit pyniaid kali (Traffic) hynrei watla kata ruh kam khang iaki paidbah ban leit phah eksamin haki Doctor ba don ha kato ka jaka.
Haba kren ha kane ka sngi u Superintendent of Police (SP) Traffic u K Prasad u la ong ba ka thong jong kane ka Free Medical health Camp ka dei ban ai ka jingsumar ei iaki nongniah kali kamai bad ki Traffic Police.
U SP u la ai khublei iaka ophis DMHO kaba la kloi ban iatreilang bad ka tnat Shillong Traffic Police ban eksamin ei iaki Driver bad ki Police kumjuh ruh iaki paidbah.
“Kane ka jingai sumar ei kam dei tang na ka bynta ki pulit hynrei na ka bynta ki nongniah kali kali bad ki paidbah ki ba don beit ha surok, namar ki lah ban don ka jingshitom ha ka jing mut, ki lah ban shem jingjar tang na ka daw ka jing sawa ki horn kali bad kiwei de ki jait jingpang” u la ong.
Ha kane ka sngi ka don ka jingeksamin bad jingsumar ei na ka bynta ki khmat, ki shkor, ka jingleh test ia ka shini bad kiwei kiwei de.
Ki Doctor kiba eksamin bad sumar ei ha kane ka sngi kila pynsngew shaki paidbah haba iadei bad ka jingdonkam ban don ha ka met ka phad kaba koit ba khiah, bad kila kyntu ruh iaki paidbah ban long kiba la kloi ban phah Test ne phah peit ha ki Doktor khnang ban lait na kano kano ka jingeh hadien habud.
